log kahte hain mohabbat mein asar hota hai

log kahte haiñ mohabbat meñ asar hotā hai

kaun se shahr meñ hotā hai kidhar hotā hai

us ke kūche meñ hai nit sūrat-e-bedād na.ī

qatl har ḳhasta bā-andāz-e-digar hotā hai

nahīñ ma.alūm ki mātam hai falak par kis kā

roz kyuuñ chaak girebān-e-sahar hotā hai

vūhīñ apnī bhī hai bārīk-tar-az-mū gardan

teġh ke saath yahāñ zikr-e-kamar hotā hai

kar ke maiñ yaad dil apne ko bahut rotā huuñ

jab kisī shaḳhs kā duniyā se safar hotā hai

us kī mizhgāñ kā koī naam na lo kyā hāsil

merā in bātoñ se surāḳh jigar hotā hai

'mus.hafī' ham to tire milne ko aa.e ka.ī baar

ai divāne tū kisī vaqt bhī ghar hotā hai

log kahte hain mohabbat mein asar hota hai

kaun se shahr mein hota hai kidhar hota hai

us ke kuche mein hai nit surat-e-bedad nai

qatl har KHasta ba-andaz-e-digar hota hai

nahin malum ki matam hai falak par kis ka

roz kyun chaak gireban-e-sahar hota hai

wuhin apni bhi hai barik-tar-az-mu gardan

tegh ke sath yahan zikr-e-kamar hota hai

kar ke main yaad dil apne ko bahut rota hun

jab kisi shaKHs ka duniya se safar hota hai

us ki mizhgan ka koi nam na lo kya hasil

mera in baaton se suraKH jigar hota hai

'mushafi' hum to tere milne ko aae kai bar

ai diwane tu kisi waqt bhi ghar hota hai