logo ab kaisa gila kaisi shikayat uski

logo ab kaisā gila kaisī shikāyat us kī

ishq ho jaa.e to jaa.ez hai imāmat us kī

us ne mujh ko bhī banā Daalā kaḌe dil vaalā

mujh ko rone nahīñ detī hai mohabbat us kī

dekhne meñ to vo ik aam sī laḌkī hai magar

ishq har roz baḌhā detā hai qīmat us kī

jis tarah dekho lage jism mukammal us kā

kaise poshāk chhupā saktī hai zīnat us kī

bhūlnā chāhūñ to aa jaatī hai kuchh aur qarīb

dil kī dīvār se lag jaatī hai sūrat us kī

tum ko shāyad hī nazar aa.e mumāsil us kā

is tarah chāñd meñ DhūñDo na shabāhat us kī

us ko dekho to kabhī dhūp-bhare sāhil par

jab zarā sāñvlī ho jaatī hai rangat us kī

us kā chehra na kisī shaḳhs ko dhokā degā

us kā chehra jo chhupātā nahīñ nafrat us kī

jab bhī sajde meñ vo rakh detī hai peshānī ko

mere kamre meñ mahak jaatī hai barkat us kī

ghar bhī pakvān kī ḳhushbū meñ basā rahtā hai

phailtī jaatī hai har samt bhī lazzat us kī

ek mahshar hai dil-o-jāñ meñ utarnā us kā

mujh meñ har roz hī barpā hai qayāmat us kī

logo ab kaisa gila kaisi shikayat us ki

ishq ho jae to jaez hai imamat us ki

us ne mujh ko bhi bana Dala kaDe dil wala

mujh ko rone nahin deti hai mohabbat us ki

dekhne mein to wo ek aam si laDki hai magar

ishq har roz baDha deta hai qimat us ki

jis tarah dekho lage jism mukammal us ka

kaise poshak chhupa sakti hai zinat us ki

bhulna chahun to aa jati hai kuchh aur qarib

dil ki diwar se lag jati hai surat us ki

tum ko shayad hi nazar aae mumasil us ka

is tarah chand mein DhunDo na shabahat us ki

us ko dekho to kabhi dhup-bhare sahil par

jab zara sanwli ho jati hai rangat us ki

us ka chehra na kisi shaKHs ko dhoka dega

us ka chehra jo chhupata nahin nafrat us ki

jab bhi sajde mein wo rakh deti hai peshani ko

mere kamre mein mahak jati hai barkat us ki

ghar bhi pakwan ki KHushbu mein basa rahta hai

phailti jati hai har samt bhi lazzat us ki

ek mahshar hai dil-o-jaan mein utarna us ka

mujh mein har roz hi barpa hai qayamat us ki