luT gae ahl-e-gham jal gae aashiyan barq ka tilmilana ghazab ho gaya

luT ga.e ahl-e-ġham jal ga.e āshiyāñ barq kā tilmilānā ġhazab ho gayā

jin ke aane kī māñgī thī barsoñ duā un bahāroñ kā aanā ġhazab ho gayā

fikr-e-hastī ga.ī fikr-e-duniyā ga.ī āsmāñ ke gile ġham kī biptā ga.ī

ho ga.e gul sabhī jagmagāte diye sham-e-ulfat jalānā ġhazab ho gayā

aañkh pur-āb maġhmūm hai zindagī dil hai betāb āñkhoñ se niiñd uḌ ga.ī

un kī mahfil meñ jaanā to mushkil na thā un kī mahfil se aanā ġhazab ho gayā

sāmne se mire jab bhī jaate haiñ vo ruḳh bachāte haiñ nazreñ churāte haiñ vo

pyaar un se jatānā sitam ho gayā raaz dil kā batānā ġhazab ho gayā

chāñd sharmā gayā phuul qurbāñ hue husn-e-kaun-o-makāñ aa gayā vajd meñ

'shauq' ko dekh kar bazm meñ aap kā zer-e-lab muskurānā ġhazab ho gayā

luT gae ahl-e-gham jal gae aashiyan barq ka tilmilana ghazab ho gaya

jin ke aane ki mangi thi barson dua un bahaaron ka aana ghazab ho gaya

fikr-e-hasti gai fikr-e-duniya gai aasman ke gile gham ki bipta gai

ho gae gul sabhi jagmagate diye sham-e-ulfat jalana ghazab ho gaya

aankh pur-ab maghmum hai zindagi dil hai betab aankhon se nind uD gai

un ki mahfil mein jaana to mushkil na tha un ki mahfil se aana ghazab ho gaya

samne se mere jab bhi jate hain wo ruKH bachate hain nazren churaate hain wo

pyar un se jatana sitam ho gaya raaz dil ka batana ghazab ho gaya

chand sharma gaya phul qurban hue husn-e-kaun-o-makan aa gaya wajd mein

'shauq' ko dekh kar bazm mein aap ka zer-e-lab muskurana ghazab ho gaya