luTate hain wo bagh-e-ishq jae jis ka ji chahe

luTāte haiñ vo bāġh-e-ishq jaa.e jis kā jī chāhe

gul-e-dāġh-e-tamannā luuT laa.e jis kā jī chāhe

charāġh-e-yās-o-hasrat ham haiñ mahfil meñ hasīnoñ kī

jalā.e jis kā jī chāhe bujhā.e jis kā jī chāhe

kasī ma.ashūq kī koī ḳhatā maiñ ne nahīñ kī hai

satāne ko zabardastī satā.e jis kā jī chāhe

ba-hal shauq-e-shahādat meñ kiyā hai ham ne ḳhuun apnā

hamāre shauq se purze uḌaa.e jis kā jī chāhe

do-ālam meñ nahīñ ai yaar mujh sā shefta terā

mohabbat yuuñ jatāne ko jatā.e jis kā jī chāhe

ḳhushī o nā-ḳhushī mauqūf hai apnī hasīnoñ par

hañsā.e jis kā jī chāhe rulā.e jis kā jī chāhe

sadā.eñ surḳh-rūī detī hai ganj-e-shahīdāñ meñ

lahū kā meñh barastā hai nahā.e jis kā jī chāhe

jo ho jā.egā parvāna charāġh-e-husn kā us ke

karegā naam raushan lau lagā.e jis kā jī chāhe

ajā.ib lutf haiñ kū-e-tavakkul kī faqīrī meñ

ḳhudā.ī hai yahāñ dhūnī ramā.e jis kā jī chāhe

koī ġhuncha na pahuñchegā tire husn-e-tabassum ko

sar-e-maidāñ chaman meñ muskurā.e jis kā jī chāhe

jagah us sham.a-rū ne dī hai parvānoñ ke lashkar ko

sar-e-maidāñ chaman maiñ muskurā.e jis kā jī chāhe

pashemāñ ġhuncha-o-gul hoñge mere zaḳhm-e-ḳhandāñ se

hañse jī chāhe jis kā muskurā.e jis kā jī chāhe

atā kī nahr-e-gulshan us ne apne ishq-bāzoñ ko

ijāzat dī yahāñ nikhre nahā.e jis kā jī chāhe

ḳhushī ho ho ke ḳhud sayyād kahtā hai anādil se

bahār aa.ī huī hai chahchahā.e jis kā jī chāhe

na dekheñge kisī betāb ko vo aañkh uThā ke bhī

kaleje ko masose tilmilā.e jis kā jī chāhe

mareñge us pe kalma paḌh ke us kā jaan ham deñge

ḳhudā.ī bhar meñ ham ko āzmā.e jis kā jī chāhe

ajab ḳhushbū hai gul-daste meñ shauq-o-zauq ke us kī

karegā vajd pairāhan basā.e jis kā jī chāhe

duā-e-maġhfirat tum do utāre qabr meñ koī

paḌho talqīn tum shāna hilā.e jis kā jī chāhe

'sharaf' dam toḌte haiñ ik parī-rū kī judā.ī meñ

ajab aalam hai un kā dekh aa.e jis kā jī chāhe

luTate hain wo bagh-e-ishq jae jis ka ji chahe

gul-e-dagh-e-tamanna luT lae jis ka ji chahe

charagh-e-yas-o-hasrat hum hain mahfil mein hasinon ki

jalae jis ka ji chahe bujhae jis ka ji chahe

kasi mashuq ki koi KHata main ne nahin ki hai

satane ko zabardasti satae jis ka ji chahe

ba-hal shauq-e-shahadat mein kiya hai hum ne KHun apna

hamare shauq se purze uDae jis ka ji chahe

do-alam mein nahin ai yar mujh sa shefta tera

mohabbat yun jatane ko jatae jis ka ji chahe

KHushi o na-KHushi mauquf hai apni hasinon par

hansae jis ka ji chahe rulae jis ka ji chahe

sadaen surKH-rui deti hai ganj-e-shahidan mein

lahu ka meinh barasta hai nahae jis ka ji chahe

jo ho jaega parwana charagh-e-husn ka us ke

karega nam raushan lau lagae jis ka ji chahe

ajaib lutf hain ku-e-tawakkul ki faqiri mein

KHudai hai yahan dhuni ramae jis ka ji chahe

koi ghuncha na pahunchega tere husn-e-tabassum ko

sar-e-maidan chaman mein muskurae jis ka ji chahe

jagah us shama-ru ne di hai parwanon ke lashkar ko

sar-e-maidan chaman main muskurae jis ka ji chahe

pasheman ghuncha-o-gul honge mere zaKHm-e-KHandan se

hanse ji chahe jis ka muskurae jis ka ji chahe

ata ki nahr-e-gulshan us ne apne ishq-bazon ko

ijazat di yahan nikhre nahae jis ka ji chahe

KHushi ho ho ke KHud sayyaad kahta hai anadil se

bahaar aai hui hai chahchahae jis ka ji chahe

na dekhenge kisi betab ko wo aankh uTha ke bhi

kaleje ko masose tilmilae jis ka ji chahe

marenge us pe kalma paDh ke us ka jaan hum denge

KHudai bhar mein hum ko aazmae jis ka ji chahe

ajab KHushbu hai gul-daste mein shauq-o-zauq ke us ki

karega wajd pairahan basae jis ka ji chahe

dua-e-maghfirat tum do utare qabr mein koi

paDho talqin tum shana hilae jis ka ji chahe

'sharaf' dam toDte hain ek pari-ru ki judai mein

ajab aalam hai un ka dekh aae jis ka ji chahe