lutf gunah mein mila aur na maza sawab mein

lutf gunāh meñ milā aur na maza savāb meñ

umr tamām kaT ga.ī kāvish-e-ehtisāb meñ

tere shabāb ne kiyā mujh ko junūñ se āshnā

mere junūñ ne bhar diye rañg tirī shabāb meñ

aah ye dil ki jāñ-gudāz joshish-e-iztirāb hai

haa.e vo daur jab kabhī lutf thā iztirāb meñ

qalb taḌap taḌap uThā ruuh laraz laraz ga.ī

bijliyāñ thiiñ bharī huī zamzama-e-rubāb meñ

charḳh bhī mai-parast hai bazm-e-zamīñ bhī mast hai

ġharq-e-buland-o-past hai jalva-e-māhtāb meñ

mere liye ajiib haiñ terī ye muskurāhaTeñ

jaag rahā huuñ yā tujhe dekh rahā huuñ ḳhvāb meñ

mere sukūt meñ nihāñ hai mire dil kī dāstāñ

jhuk ga.ī chashm-e-fitna-zā Duub ga.ī hijāb meñ

lazzat-e-jām-e-jam kabhī talḳhi-e-zahr-e-ġham kabhī

ishrat-e-zīst hai 'asar' gardish-e-inqilāb meñ

lutf gunah mein mila aur na maza sawab mein

umr tamam kaT gai kawish-e-ehtisab mein

tere shabab ne kiya mujh ko junun se aashna

mere junun ne bhar diye rang teri shabab mein

aah ye dil ki jaan-gudaz joshish-e-iztirab hai

hae wo daur jab kabhi lutf tha iztirab mein

qalb taDap taDap uTha ruh laraz laraz gai

bijliyan thin bhari hui zamzama-e-rubab mein

charKH bhi mai-parast hai bazm-e-zamin bhi mast hai

gharq-e-buland-o-past hai jalwa-e-mahtab mein

mere liye ajib hain teri ye muskurahaTen

jag raha hun ya tujhe dekh raha hun KHwab mein

mere sukut mein nihan hai mere dil ki dastan

jhuk gai chashm-e-fitna-za Dub gai hijab mein

lazzat-e-jam-e-jam kabhi talKHi-e-zahr-e-gham kabhi

ishrat-e-zist hai 'asar' gardish-e-inqilab mein