luTne walon ka madad-gar nahin hai koi

luTne vāloñ kā madad-gār nahīñ hai koī

is qabīle kā bhī sardār nahīñ hai koī

maiñ vo mahrūm-e-tamannā huuñ ki jis kī ḳhātir

bharī bastī meñ azādār nahīñ hai koī

shāh-zādī tirī āñkhoñ meñ ye dahshat kaisī

phuul haiñ haath meñ talvār nahīñ hai koī

dil kisī vaqt kisī par bhī fidā ho jaa.e

ye vo kashtī hai ki patvār nahīñ hai koī

aañkh meñ ashk nahīñ haiñ to yahī lagtā hai

ik sitārā bhī numūdār nahīñ hai koī

mujh ko is baat se aatā hai bahut ḳhauf yahāñ

sab farishte haiñ gunahgār nahīñ hai koī

dekh ye zaḳhm tarāshe hue lagte haiñ tujhe

tū samajhtā hai mirā yaar nahīñ hai koī

ik ḳhalā aur bahut gahrā ḳhalā hai 'sāhir'

dekh aayā huuñ maiñ us paar nahīñ hai koī

luTne walon ka madad-gar nahin hai koi

is qabile ka bhi sardar nahin hai koi

main wo mahrum-e-tamanna hun ki jis ki KHatir

bhari basti mein azadar nahin hai koi

shah-zadi teri aankhon mein ye dahshat kaisi

phul hain hath mein talwar nahin hai koi

dil kisi waqt kisi par bhi fida ho jae

ye wo kashti hai ki patwar nahin hai koi

aankh mein ashk nahin hain to yahi lagta hai

ek sitara bhi numudar nahin hai koi

mujh ko is baat se aata hai bahut KHauf yahan

sab farishte hain gunahgar nahin hai koi

dekh ye zaKHm tarashe hue lagte hain tujhe

tu samajhta hai mera yar nahin hai koi

ek KHala aur bahut gahra KHala hai 'sahir'

dekh aaya hun main us par nahin hai koi