maal-e-gardish-e-lail-o-nahaar kuchh bhi nahin

ma.āl-e-gardish-e-lail-o-nahār kuchh bhī nahīñ

hazār naqsh haiñ aur āshkār kuchh bhī nahīñ

har ek moḌ pe duniyā ko ham ne dekh liyā

sivā.e kashmakash-e-rozgār kuchh bhī nahīñ

nishān-e-rāh mile bhī yahāñ to kaise mile

sivā.e ḳhāk-e-sar-e-rahguzār kuchh bhī nahīñ

bahut qarīb rahī hai ye zindagī ham se

bahut aziiz sahī e'tibār kuchh bhī nahīñ

na ban paḌā ki garebāñ ke chaak sī lete

shu.ūr ho ki junūñ iḳhtiyār kuchh bhī nahīñ

khile jo phuul vo dast-e-ḳhizāñ ne chhīn liye

nasīb-e-dāman-e-fasl-e-bahār kuchh bhī nahīñ

zamāna ishq ke māroñ ko maat kyā degā

diloñ ke khel meñ ye jiit haar kuchh bhī nahīñ

ye merā shahr hai maiñ kaise maan luuñ 'aḳhtar'

na rasm-o-rāh na vo kū-e-yār kuchh bhī nahīñ

maal-e-gardish-e-lail-o-nahaar kuchh bhi nahin

hazar naqsh hain aur aashkar kuchh bhi nahin

har ek moD pe duniya ko hum ne dekh liya

siwae kashmakash-e-rozgar kuchh bhi nahin

nishan-e-rah mile bhi yahan to kaise mile

siwae KHak-e-sar-e-rahguzar kuchh bhi nahin

bahut qarib rahi hai ye zindagi hum se

bahut aziz sahi e'tibar kuchh bhi nahin

na ban paDa ki gareban ke chaak si lete

shuur ho ki junun iKHtiyar kuchh bhi nahin

khile jo phul wo dast-e-KHizan ne chhin liye

nasib-e-daman-e-fasl-e-bahaar kuchh bhi nahin

zamana ishq ke maron ko mat kya dega

dilon ke khel mein ye jit haar kuchh bhi nahin

ye mera shahr hai main kaise man lun 'aKHtar'

na rasm-o-rah na wo ku-e-yar kuchh bhi nahin