mahaul munasib ho to upar nahin jate

māhaul munāsib ho to uupar nahīñ jaate

ham taaza ghuTan chhoḌ ke chhat par nahīñ jaate

dekho mujhe ab merī jagah se na hilānā

phir tum mujhe tartīb se rakh kar nahīñ jaate

badnām haiñ sadiyoñ se hī kāñToñ kī vajah se

aadat se magar aaj bhī kīkar nahīñ jaate

jis din se shikārī ne adā kī koī mannat

darbār pe us din se kabūtar nahīñ jaate

so tum mujhe hairat-zada āñkhoñ se na dekho

kuchh log sañbhal jaate haiñ sab mar nahīñ jaate

mahaul munasib ho to upar nahin jate

hum taza ghuTan chhoD ke chhat par nahin jate

dekho mujhe ab meri jagah se na hilana

phir tum mujhe tartib se rakh kar nahin jate

badnam hain sadiyon se hi kanTon ki wajah se

aadat se magar aaj bhi kikar nahin jate

jis din se shikari ne ada ki koi mannat

darbar pe us din se kabutar nahin jate

so tum mujhe hairat-zada aankhon se na dekho

kuchh log sanbhal jate hain sab mar nahin jate