malum hai wo mujhse KHafa hai bhi nahin bhi

mālūm hai vo mujh se ḳhafā hai bhī nahīñ bhī

mere liye hoñToñ pe duā hai bhī nahīñ bhī

muddat huī is raah se guzre hue us ko

āñkhoñ meñ vo naqsh-e-kaf-e-pā hai bhī nahīñ bhī

muñh khol ke bolā nahīñ jaatā ki shifā de

us paas mire dil kī davā hai bhī nahīñ bhī

kahte the kabhī ham ki ḳhudā hai to kahāñ hai

ab soch rahe haiñ ki ḳhudā hai bhī nahīñ bhī

rakkhe bhī nazar bazm meñ dekhe bhī nahīñ vo

auroñ se ye andāz judā hai bhī nahīñ bhī

go ziist hai miTtī huī sāñsoñ kā tasalsul

qistoñ meñ ye jiine kī sazā hai bhī nahīñ bhī

yā dil meñ kabhī yā kabhī saḌkoñ pe mileñge

ham ḳhāna-ḳharāboñ kā patā hai bhī nahīñ bhī

ham se jo banā sab ke liye ham ne kiyā hai

mālūm hai nekī kā sila hai bhī nahīñ bhī

vo mom bhī hai mere liye sañg bhī 'āzar'

kahte haiñ ki is dil meñ vafā hai bhī nahīñ bhī

malum hai wo mujh se KHafa hai bhi nahin bhi

mere liye honTon pe dua hai bhi nahin bhi

muddat hui is rah se guzre hue us ko

aankhon mein wo naqsh-e-kaf-e-pa hai bhi nahin bhi

munh khol ke bola nahin jata ki shifa de

us pas mere dil ki dawa hai bhi nahin bhi

kahte the kabhi hum ki KHuda hai to kahan hai

ab soch rahe hain ki KHuda hai bhi nahin bhi

rakkhe bhi nazar bazm mein dekhe bhi nahin wo

auron se ye andaz juda hai bhi nahin bhi

go zist hai miTti hui sanson ka tasalsul

qiston mein ye jine ki saza hai bhi nahin bhi

ya dil mein kabhi ya kabhi saDkon pe milenge

hum KHana-KHarabon ka pata hai bhi nahin bhi

hum se jo bana sab ke liye hum ne kiya hai

malum hai neki ka sila hai bhi nahin bhi

wo mom bhi hai mere liye sang bhi 'azar'

kahte hain ki is dil mein wafa hai bhi nahin bhi