mamuli be-kar samajhne wale mujhse dur rahen

ma.amūlī be-kār samajhne vaale mujh se duur raheñ

mujh ko ik āzār samajhne vaale mujh se duur raheñ

pāgal-pan meñ aa kar pāgal kuchh bhī to kar saktā hai

ḳhud ko izzat-dār samajhne vaale mujh se duur raheñ

hañs paḌtā huuñ jab koī hālāt kā ronā rotā hai

jīvan ko dushvār samajhne vaale mujh se duur raheñ

maiñ vāqif huuñ rañgoñ kī har rañg badaltī fitrat se

raunaq ko bāzār samajhne vaale mujh se duur raheñ

majnūñ aur shāhoñ meñ kuchh din maiñ bhī uTThā baiThā huuñ

sahrā ko gulzār samajhne vaale mujh se duur raheñ

manzil kī ḳhvāhish hai jin ko aa.eñ mere saath chaleñ

rastoñ ko hamvār samajhne vaale mujh se duur raheñ

āñchal aur malbūs pe jin kī āñkheñ chipkī rahtī haiñ

un ko bā-kirdār samajhne vaale mujh se duur raheñ

'faiz-ālam-bābar' ḳhud bhī yaar hai jaane kis kis kā

yāroñ ko makkār samajhne vaale mujh se duur raheñ

mamuli be-kar samajhne wale mujh se dur rahen

mujh ko ek aazar samajhne wale mujh se dur rahen

pagal-pan mein aa kar pagal kuchh bhi to kar sakta hai

KHud ko izzat-dar samajhne wale mujh se dur rahen

hans paDta hun jab koi haalat ka rona rota hai

jiwan ko dushwar samajhne wale mujh se dur rahen

main waqif hun rangon ki har rang badalti fitrat se

raunaq ko bazar samajhne wale mujh se dur rahen

majnun aur shahon mein kuchh din main bhi uTTha baiTha hun

sahra ko gulzar samajhne wale mujh se dur rahen

manzil ki KHwahish hai jin ko aaen mere sath chalen

raston ko hamwar samajhne wale mujh se dur rahen

aanchal aur malbus pe jin ki aankhen chipki rahti hain

un ko ba-kirdar samajhne wale mujh se dur rahen

'faiz-alam-babar' KHud bhi yar hai jaane kis kis ka

yaron ko makkar samajhne wale mujh se dur rahen