mana ki mera dil bhi jigar bhi hai koi chiz

maanā ki mirā dil bhī jigar bhī hai koī chiiz

lekin vo nazar tīr-e-nazar bhī hai koī chiiz

mumkin nahīñ vo chāhne vāloñ ko na chāheñ

iḳhlās-o-mohabbat kā asar bhī hai koī chiiz

luT jaa.e ki rah jaa.e rah-e-ishq-o-vafā meñ

dil bhī hai koī maal jigar bhī hai koī chiiz

un se jo na uTThā thā use is ne uThāyā

qaa.il haiñ malā.ek ki bashar bhī hai koī chiiz

chhupne ke liye shauq se parde meñ chhupeñ aap

itnā rahe ma.alūm nazar bhī hai koī chiiz

ye kasrat-e-āzār-o-ġham-o-rañj kahāñ tak

ai shaam shab-e-hijr-e-sahar bhī hai koī chiiz

kahte ho ham ā.eñge magar zulm kareñge

socho tum agar to ye magar bhī hai koī chiiz

baaqī na rahī nāvak-e-dil-doz kī hājat

zālim tirī sīdhī sī nazar bhī hai koī chiiz

naale se kahūñgā ki pahuñch arsh-e-barīñ tak

ab tez musāfir ye safar bhī hai koī chiiz

betāb udhar aap pareshān idhar ham

aapas kī mohabbat kā asar bhī hai koī chiiz

chaltī huī mere dil-e-betāb ko le kar

lākhoñ meñ vo duzdīda nazar bhī hai koī chiiz

be-kār na jā.egā mire dil kā taḌapnā

naala hai koī shai to asar bhī hai koī chiiz

āñkhoñ ke liye zauq-e-nazar bhī hai koī baat

pahlū ke liye dard-e-jigar bhī hai koī chiiz

allāh re tire husn-e-ziyā-bār kā jalva

ye pesh-e-nazar ho to nazar bhī hai koī chiiz

ai 'nūh' shab-e-māh meñ paas us ko biThā kar

kahtā huuñ mirā rashk-e-qamar bhī hai koī chiiz

mana ki mera dil bhi jigar bhi hai koi chiz

lekin wo nazar tir-e-nazar bhi hai koi chiz

mumkin nahin wo chahne walon ko na chahen

iKHlas-o-mohabbat ka asar bhi hai koi chiz

luT jae ki rah jae rah-e-ishq-o-wafa mein

dil bhi hai koi mal jigar bhi hai koi chiz

un se jo na uTTha tha use is ne uThaya

qail hain malaek ki bashar bhi hai koi chiz

chhupne ke liye shauq se parde mein chhupen aap

itna rahe malum nazar bhi hai koi chiz

ye kasrat-e-azar-o-gham-o-ranj kahan tak

ai sham shab-e-hijr-e-sahar bhi hai koi chiz

kahte ho hum aaenge magar zulm karenge

socho tum agar to ye magar bhi hai koi chiz

baqi na rahi nawak-e-dil-doz ki hajat

zalim teri sidhi si nazar bhi hai koi chiz

nale se kahunga ki pahunch arsh-e-barin tak

ab tez musafir ye safar bhi hai koi chiz

betab udhar aap pareshan idhar hum

aapas ki mohabbat ka asar bhi hai koi chiz

chalti hui mere dil-e-betab ko le kar

lakhon mein wo duzdida nazar bhi hai koi chiz

be-kar na jaega mere dil ka taDapna

nala hai koi shai to asar bhi hai koi chiz

aankhon ke liye zauq-e-nazar bhi hai koi baat

pahlu ke liye dard-e-jigar bhi hai koi chiz

allah re tere husn-e-ziya-bar ka jalwa

ye pesh-e-nazar ho to nazar bhi hai koi chiz

ai 'nuh' shab-e-mah mein pas us ko biTha kar

kahta hun mera rashk-e-qamar bhi hai koi chiz