mana rah-e-hayat mein tanha hayat hai

maanā rah-e-hayāt meñ tanhā hayāt hai

mahsūs ho rahā hai koī saath saath hai

kyā ġham bichhaḌ gayā huuñ agar kārvāñ se maiñ

tum saath ho to saath mire kā.enāt hai

vo muskurā diye to hai aalam hī dūsrā

raushan mirī hayāt kī tārīk raat hai

shāyad hai muntashir abhī shīrāza-e-vajūd

kyoñ varna aadmī se gurezāñ hayāt hai

maiñ hādsāt-e-dahr ko ilzām kaise duuñ

apnī tabāhiyoñ meñ ḳhud apnā hī haath hai

do ghūñT tū bhī chakh le ki ho jaa.e lā-zavāl

ai maut mere haath meñ jām-e-hayāt hai

kāñTe mile kisī ko kisī ko mile haiñ phuul

yaaro ye apne apne muqaddar kī baat hai

dast-e-ḳhizāñ bahār ko chhūtā nahīñ 'nashāt'

tum jis ko maut kahte ho vo bhī hayāt hai

mana rah-e-hayat mein tanha hayat hai

mahsus ho raha hai koi sath sath hai

kya gham bichhaD gaya hun agar karwan se main

tum sath ho to sath mere kaenat hai

wo muskura diye to hai aalam hi dusra

raushan meri hayat ki tarik raat hai

shayad hai muntashir abhi shiraaza-e-wajud

kyon warna aadmi se gurezan hayat hai

main hadsat-e-dahr ko ilzam kaise dun

apni tabahiyon mein KHud apna hi hath hai

do ghunT tu bhi chakh le ki ho jae la-zawal

ai maut mere hath mein jam-e-hayat hai

kanTe mile kisi ko kisi ko mile hain phul

yaro ye apne apne muqaddar ki baat hai

dast-e-KHizan bahaar ko chhuta nahin 'nashat'

tum jis ko maut kahte ho wo bhi hayat hai