mani-o-mafhum kya hon ishq ke mazmun mein

ma.anī-o-mafhūm kyā hoñ 'ishq ke mazmūn meñ

jis tarah koī ḳhayāl aa.e dil-e-majnūn meñ

'ishq se hotī hai is shiddat kī garmī ḳhuun meñ

khaultā hai jaise dariyā dopahar ko june meñ

jism meñ rag rag phaḌak uThtī hai soz-e-ishq se

garm-e-tuġhiyāñ jis tarah amvāj hoñ jaijūn meñ

husn se vāzeh huī hai mā'naviyyat 'ishq kī

shāmil-e-mafhūm hai 'unvān bhī mazmūn hai

yuuñ to haiñ ajzā bahut se shāmil-e-tarkīb-e-ishq

aarzū lekin sar-e-dārū hai is mā'jūn meñ

is tarah huuñ qaidī-e-hālāt 'bismil' jis tarah

sher ho piñjre meñ yā shāh-e-zafar rangūn meñ

mani-o-mafhum kya hon 'ishq ke mazmun mein

jis tarah koi KHayal aae dil-e-majnun mein

'ishq se hoti hai is shiddat ki garmi KHun mein

khaulta hai jaise dariya dopahar ko june mein

jism mein rag rag phaDak uThti hai soz-e-ishq se

garm-e-tughiyan jis tarah amwaj hon jaijun mein

husn se wazeh hui hai ma'nawiyyat 'ishq ki

shamil-e-mafhum hai 'unwan bhi mazmun hai

yun to hain ajza bahut se shamil-e-tarkib-e-ishq

aarzu lekin sar-e-daru hai is ma'jun mein

is tarah hun qaidi-e-haalat 'bismil' jis tarah

sher ho pinjre mein ya shah-e-zafar rangun mein