marka jab chhiD gaya to kya hua humse suno

ma.arka jab chhiḌ gayā to kyā huā ham se suno

kushtagān-e-shahr-e-ḳhūñ kā mājrā ham se suno

kyuuñ shajar sūkhe hue haiñ kyuuñ nahīñ barg o samar

mausamoñ ne is chaman meñ kyā kiyā ham se suno

parda-e-sad-rañg-hairat ḳhāna-e-nairañg meñ

kaun hai ā.īna-andar-ā.ina ham se suno

taaq o dar meñ kyuuñ charāġhoñ kī laveñ ḳhāmosh haiñ

kyā huā vo raushnī kā silsila ham se suno

aur ye chashm-e-tamāshā band ho jaatī hai jab

parda-e-dil par nazar aatā hai kyā ham se suno

kyuuñ nahīñ hote munājātoñ ke ma.anī munkashif

ramz ban jaatā hai kyuuñ harf-e-duā ham se suno

marka jab chhiD gaya to kya hua hum se suno

kushtagan-e-shahr-e-KHun ka majra hum se suno

kyun shajar sukhe hue hain kyun nahin barg o samar

mausamon ne is chaman mein kya kiya hum se suno

parda-e-sad-rang-hairat KHana-e-nairang mein

kaun hai aaina-andar-aina hum se suno

taq o dar mein kyun charaghon ki lawen KHamosh hain

kya hua wo raushni ka silsila hum se suno

aur ye chashm-e-tamasha band ho jati hai jab

parda-e-dil par nazar aata hai kya hum se suno

kyun nahin hote munajaton ke mani munkashif

ramz ban jata hai kyun harf-e-dua hum se suno