mashuq hamein baat ka pura nahin milta

māshūq hameñ baat kā puurā nahīñ miltā

dil jis se milā.eñ koī aisā nahīñ miltā

duniyā meñ agar DhūñDiye to kyā nahīñ miltā

sab milte haiñ ik chāhne vaalā nahīñ miltā

ushshāq se yuuñ aañkh tumhārī nahīñ miltī

aġhyār se dil jaise hamārā nahīñ miltā

rahtī hai kasar ek na ik baat kī sab meñ

ham ko to in achchhoñ meñ bhī achchhā nahīñ miltā

kuchh haal sune kuchh hameñ tadbīr batā.e

ġham-ḳhvār to kaisā koī itnā nahīñ miltā

kyā muft meñ tum dil ke ḳharīdār bane ho

be-ḳharch kiye daam ye saudā nahīñ miltā

jab dekhiye hamrāh hai dushman kā tasavvur

ham se to vo ḳhalvat meñ bhī tanhā nahīñ miltā

dil koī milātā nahīñ TuuTe hue dil se

duniyā meñ hameñ joḌ hamārā nahīñ miltā

barbād kiyā yaas ne yuuñ ḳhāna-e-dil ko

DhūñDe se bhī ab dāġh-e-tamannā nahīñ miltā

jo baat hai duniyā se nirālī hai na.ī hai

andāz kisī meñ bhī tumhārā nahīñ miltā

āñkheñ kahe detī haiñ ki dil saaf nahīñ hai

miltā hai vo is rañg se goyā nahīñ miltā

kahte haiñ jalāne ko ham aġhyār ke muñh par

aisoñ se to vo rashk-e-masīhā nahīñ miltā

zāhir hai mulāqāt hai bātin meñ judā.ī

tum milte ho dil ham se tumhārā nahīñ miltā

afsos to ye hai ki tumheñ qadr nahīñ hai

āshiq to zamāne meñ bhī DhūñDā nahīñ miltā

kahnā vo sharārat se tirā dil ko churā kar

kyā DhūñDte ho ham se kaho kyā nahīñ miltā

'beḳhud' nigah-e-lutf pe de Dāliye dil ko

jo miltā hai sarkār se thoḌā nahīñ miltā

mashuq hamein baat ka pura nahin milta

dil jis se milaen koi aisa nahin milta

duniya mein agar DhunDiye to kya nahin milta

sab milte hain ek chahne wala nahin milta

ushshaq se yun aankh tumhaari nahin milti

aghyar se dil jaise hamara nahin milta

rahti hai kasar ek na ek baat ki sab mein

hum ko to in achchhon mein bhi achchha nahin milta

kuchh haal sune kuchh hamein tadbir batae

gham-KHwar to kaisa koi itna nahin milta

kya muft mein tum dil ke KHaridar bane ho

be-KHarch kiye dam ye sauda nahin milta

jab dekhiye hamrah hai dushman ka tasawwur

hum se to wo KHalwat mein bhi tanha nahin milta

dil koi milata nahin TuTe hue dil se

duniya mein hamein joD hamara nahin milta

barbaad kiya yas ne yun KHana-e-dil ko

DhunDe se bhi ab dagh-e-tamanna nahin milta

jo baat hai duniya se nirali hai nai hai

andaz kisi mein bhi tumhaara nahin milta

aankhen kahe deti hain ki dil saf nahin hai

milta hai wo is rang se goya nahin milta

kahte hain jalane ko hum aghyar ke munh par

aison se to wo rashk-e-masiha nahin milta

zahir hai mulaqat hai baatin mein judai

tum milte ho dil hum se tumhaara nahin milta

afsos to ye hai ki tumhein qadr nahin hai

aashiq to zamane mein bhi DhunDa nahin milta

kahna wo shararat se tera dil ko chura kar

kya DhunDte ho hum se kaho kya nahin milta

'beKHud' nigah-e-lutf pe de Daliye dil ko

jo milta hai sarkar se thoDa nahin milta