matam-e-did hai didar ka KHwahan hona

mātam-e-dīd hai dīdār kā ḳhvāhāñ honā

jis qadar dekhnā utnā hī pashemāñ honā

saḳht dushvār hai āsān kā āsāñ honā

ḳhūn-e-fursat hai yahāñ sar-ba-garebāñ honā

terā dīvāna to vahshat kī bhī had se niklā

ki bayābāñ ko bhī chāhe hai bayābāñ honā

kūcha-e-ġhair meñ kyuuñ kar na banā.ūñ ghar ko

merī ābādī se ābād hai vīrāñ honā

ḳhāk-e-vahshī se agar rabt hai Thokar ko tirī

daur-e-dāman se nahīñ daur-e-garebāñ honā

na vo ḳhuuñ hī hai jigar meñ na vo rone kā dimāġh

mil gayā ḳhaak meñ har ashk kā tūfāñ honā

jī kā jī hī meñ rahā harf-e-tamannā afsos

kahnā kuchh aap hī aur aap pashemāñ honā

dil se andāz-e-shikan zulf ne sab jam.a kiye

chheḌ kar us ko kahīñ tū na pareshāñ honā

tujh ko armān-e-ḳharābī hai jo ai dehlī aur

siikh jā ghar meñ mire rah ke bayābāñ honā

dil hai ik qatra-e-ḳhūñ jis pe ye siina zorī

kuchh samajhtā hī nahīñ ham-saf-e-mizhgāñ honā

mujh meñ kuchh taab ho ai jaañ to maiñ be-tāb rahūñ

varna dushvār hai is raaz kā pinhāñ honā

yād-e-mizhgāñ se idhar zaḳhm-e-jigar par khānā

aur udhar shorish-e-dil se namak-afshāñ honā

aaj vo vaqt 'qalaq' par hai ki juuñ ibn-e-ḳhalīl

ġhair taslīm nahīñ qatl kā āsāñ honā

matam-e-did hai didar ka KHwahan hona

jis qadar dekhna utna hi pasheman hona

saKHt dushwar hai aasan ka aasan hona

KHun-e-fursat hai yahan sar-ba-gareban hona

tera diwana to wahshat ki bhi had se nikla

ki bayaban ko bhi chahe hai bayaban hona

kucha-e-ghair mein kyun kar na banaun ghar ko

meri aabaadi se aabaad hai viran hona

KHak-e-wahshi se agar rabt hai Thokar ko teri

daur-e-daman se nahin daur-e-gareban hona

na wo KHun hi hai jigar mein na wo rone ka dimagh

mil gaya KHak mein har ashk ka tufan hona

ji ka ji hi mein raha harf-e-tamanna afsos

kahna kuchh aap hi aur aap pasheman hona

dil se andaz-e-shikan zulf ne sab jama kiye

chheD kar us ko kahin tu na pareshan hona

tujh ko arman-e-KHarabi hai jo ai dehli aur

sikh ja ghar mein mere rah ke bayaban hona

dil hai ek qatra-e-KHun jis pe ye sina zori

kuchh samajhta hi nahin ham-saf-e-mizhgan hona

mujh mein kuchh tab ho ai jaan to main be-tab rahun

warna dushwar hai is raaz ka pinhan hona

yaad-e-mizhgan se idhar zaKHm-e-jigar par khana

aur udhar shorish-e-dil se namak-afshan hona

aaj wo waqt 'qalaq' par hai ki jun ibn-e-KHalil

ghair taslim nahin qatl ka aasan hona