mayusi mein dil bechaara sadiyon se

māyūsī meñ dil bechāra sadiyoñ se

DhūñD rahā hai ek sahārā sadiyoñ se

ek hī baat abas dohrā.e jaatā hai

tan meñ chaltā saañs kā aarā sadiyoñ se

'hīr' agarche maiñ ne apnī paalī hai

DhūñD rahā huuñ taḳht hazārā sadiyoñ se

tum se kaise simTegā ye lamhoñ meñ

dil apnā hai pāra-pāra sadiyoñ se

kis elaan ko guuñj rahā hai nas-nas meñ

dhaḌkan dhaḌkan ik naqqārā sadiyoñ se

kū-e-manzil-e-ishq meñ koī kaam mile

dil āvāra hai nākārā sadiyoñ se

dil par kyā ham ne to jānāñ jaan pe bhī

likh rakkhā hai naam tumhārā sadiyoñ se

us ne dil ke dard se pūchhā kab se ho

dil se uTh ke dard pukārā sadiyoñ se

ḳhushk paḌā hai aañkh ke parde par 'tāhir'

bahr-e-dard kā ek kinārā sadiyoñ se

mayusi mein dil bechaara sadiyon se

DhunD raha hai ek sahaara sadiyon se

ek hi baat abas dohrae jata hai

tan mein chalta sans ka aara sadiyon se

'hir' agarche main ne apni pali hai

DhunD raha hun taKHt hazara sadiyon se

tum se kaise simTega ye lamhon mein

dil apna hai para-para sadiyon se

kis elan ko gunj raha hai nas-nas mein

dhaDkan dhaDkan ek naqqara sadiyon se

ku-e-manzil-e-ishq mein koi kaam mile

dil aawara hai nakara sadiyon se

dil par kya hum ne to jaanan jaan pe bhi

likh rakkha hai nam tumhaara sadiyon se

us ne dil ke dard se puchha kab se ho

dil se uTh ke dard pukara sadiyon se

KHushk paDa hai aankh ke parde par 'tahir'

bahr-e-dard ka ek kinara sadiyon se