machlenge un ke aane pe jazbaat sainkaDon

machleñge un ke aane pe jazbāt saiñkaḌoñ

hañs bolne kī hoñgī hikāyāt saiñkaḌoñ

mayyat uThāne koī bhī aayā na bā'd-e-marg

sunte the zindagī meñ mirī baat saiñkaḌoñ

tum the to zindagī kā na koī savāl thā

ab janm le rahe haiñ savālāt saiñkaḌoñ

kyuuñ us nigāh-e-mast kī sab māñgte haiñ ḳhair

ābād aur bhī haiñ ḳharābāt saiñkaḌoñ

chamke jo tere nuur se din-rāt the vahī

aane ko yuuñ to aa.e haiñ din-rāt saiñkaḌoñ

parda-navāz husn ke qurbān jā.iye

ik ik hijāb meñ haiñ hijābāt saiñkaḌoñ

vo baat koī bhī na kahegā jo ham kaheñ

tum jo kaho kaheñge vahī baat saiñkaḌoñ

karte haiñ arz-e-vasl pe hāñ-hūñ ajī nahīñ

yā'nī savāl ik hai javābāt saiñkaḌoñ

bante haiñ zindagī ke fasāne unhīñ se 'charḳh'

vo haiñ to zindagī kī rivāyāt saiñkaḌoñ

machlenge un ke aane pe jazbaat sainkaDon

hans bolne ki hongi hikayat sainkaDon

mayyat uThane koi bhi aaya na ba'd-e-marg

sunte the zindagi mein meri baat sainkaDon

tum the to zindagi ka na koi sawal tha

ab janm le rahe hain sawalat sainkaDon

kyun us nigah-e-mast ki sab mangte hain KHair

aabaad aur bhi hain KHarabaat sainkaDon

chamke jo tere nur se din-raat the wahi

aane ko yun to aae hain din-raat sainkaDon

parda-nawaz husn ke qurban jaiye

ek ek hijab mein hain hijabaat sainkaDon

wo baat koi bhi na kahega jo hum kahen

tum jo kaho kahenge wahi baat sainkaDon

karte hain arz-e-wasl pe han-hun aji nahin

ya'ni sawal ek hai jawabaat sainkaDon

bante hain zindagi ke fasane unhin se 'charKH'

wo hain to zindagi ki riwayat sainkaDon