magar usko fareb-e-nargis-e-mastana aata hai

magar us ko fareb-e-nargis-e-mastāna aatā hai

ulaTtī haiñ safeñ gardish meñ jab paimāna aatā hai

nihāyat dil ko hai marġhūb bosa ḳhāl-e-mushkīñ kā

dahan tak apne kab tak dekhiye ye daana aatā hai

ḳhushī se apnī rusvā.ī gavārā ho nahīñ saktī

garebāñ phāḌtā hai tang jab dīvāna aatā hai

firāq-e-yār meñ dil par nahīñ ma.alūm kyā guzrī

jo ashk āñkhoñ meñ aatā hai so betābāna aatā hai

bagūle kī tarah kis kis ḳhushī se ḳhaak uḌātā huuñ

talāsh-e-ganj meñ jo sāmne vīrāna aatā hai

samajhte haiñ mire dil kī vo kyā nā-fahm o nādāñ haiñ

huzūr-e-sham.a be-matlab nahīñ parvāna aatā hai

talab duniyā ko kar ke zan-murīdī ho nahīñ saktī

ḳhayāl-e-ābrū-e-himmat-e-mardāna aatā hai

hamesha fikr se yaañ āshiqāna sher Dhalte haiñ

zabāñ ko apnī bas ik husn kā afsāna aatā hai

tamāshā-gāh-e-hastī meñ adam kā dhyān hai kis ko

kise is anjuman meñ yaad ḳhalvat-ḳhāna aatā hai

sabā kī tarah har ik ġhairat-e-gul se haiñ lag chalte

mohabbat hai sarisht apnī hameñ yārāna aatā hai

ziyārat hogī kā'ba kī yahī ta.abīr hai is kī

ka.ī shab se hamāre ḳhvāb meñ but-ḳhāna aatā hai

ḳhayāl aayā hai ā.īna kā muñh us meñ vo dekheñge

ab uljhe baal sukhlāne kī ḳhātir shāna aatā hai

phañsā detā hai murġh-e-dil ko dām-e-zulf-e-pechāñ meñ

tumhāre ḳhāl-e-ruḳh ko bhī fareb-e-dāna aatā hai

itaab o lutf jo farmāo har sūrat se raazī haiñ

shikāyat se nahīñ vāqif hameñ shukrāna aatā hai

ḳhudā kā ghar hai but-ḳhāna hamārā dil nahīñ 'ātish'

maqām-e-āshnā hai yaañ nahīñ begāna aatā hai

magar us ko fareb-e-nargis-e-mastana aata hai

ulaTti hain safen gardish mein jab paimana aata hai

nihayat dil ko hai marghub bosa KHal-e-mushkin ka

dahan tak apne kab tak dekhiye ye dana aata hai

KHushi se apni ruswai gawara ho nahin sakti

gareban phaDta hai tang jab diwana aata hai

firaq-e-yar mein dil par nahin malum kya guzri

jo ashk aankhon mein aata hai so betabana aata hai

bagule ki tarah kis kis KHushi se KHak uData hun

talash-e-ganj mein jo samne virana aata hai

samajhte hain mere dil ki wo kya na-fahm o nadan hain

huzur-e-shama be-matlab nahin parwana aata hai

talab duniya ko kar ke zan-muridi ho nahin sakti

KHayal-e-abru-e-himmat-e-mardana aata hai

hamesha fikr se yan aashiqana sher Dhalte hain

zaban ko apni bas ek husn ka afsana aata hai

tamasha-gah-e-hasti mein adam ka dhyan hai kis ko

kise is anjuman mein yaad KHalwat-KHana aata hai

saba ki tarah har ek ghairat-e-gul se hain lag chalte

mohabbat hai sarisht apni hamein yarana aata hai

ziyarat hogi ka'ba ki yahi tabir hai is ki

kai shab se hamare KHwab mein but-KHana aata hai

KHayal aaya hai aaina ka munh us mein wo dekhenge

ab uljhe baal sukhlane ki KHatir shana aata hai

phansa deta hai murgh-e-dil ko dam-e-zulf-e-pechan mein

tumhaare KHal-e-ruKH ko bhi fareb-e-dana aata hai

itab o lutf jo farmao har surat se raazi hain

shikayat se nahin waqif hamein shukrana aata hai

KHuda ka ghar hai but-KHana hamara dil nahin 'atish'

maqam-e-ashna hai yan nahin begana aata hai