mah-o-nujum ki surat safar mein rahte hain

mah-o-nujūm kī sūrat safar meñ rahte haiñ

ki shab-gazīda talāsh-e-sahar meñ rahte haiñ

hamārā aql se kuchh rabt hī nahīñ jaise

junūñ-asīr haiñ dil ke asar meñ rahte haiñ

na koī chhat hai na dīvār hai na darvāza

ye mo.ajiza hai ki ham aise ghar meñ rahte haiñ

vafā-talab to bahut haiñ vafā-shi.ār nahīñ

ye kis jahāñ meñ haiñ ham kis nagar meñ rahte haiñ

bichhaḌ ke donoñ hī ābād haiñ ḳhudā shāhid

vo apne ghar meñ to ham apne ghar meñ rahte haiñ

unhīñ se tāzgī-e-zehn hai nasīb mujhe

gulāb chehre hamesha nazar meñ rahte haiñ

jahāñ se rabt na koī ta.alluq apnā 'ḳhatīb'

ham ahl-e-ishq sadā ḳhvāb-asar meñ rahte haiñ

mah-o-nujum ki surat safar mein rahte hain

ki shab-gazida talash-e-sahar mein rahte hain

hamara aql se kuchh rabt hi nahin jaise

junun-asir hain dil ke asar mein rahte hain

na koi chhat hai na diwar hai na darwaza

ye moajiza hai ki hum aise ghar mein rahte hain

wafa-talab to bahut hain wafa-shiar nahin

ye kis jahan mein hain hum kis nagar mein rahte hain

bichhaD ke donon hi aabaad hain KHuda shahid

wo apne ghar mein to hum apne ghar mein rahte hain

unhin se tazgi-e-zehn hai nasib mujhe

gulab chehre hamesha nazar mein rahte hain

jahan se rabt na koi talluq apna 'KHatib'

hum ahl-e-ishq sada KHwab-asar mein rahte hain