mah-o-parwin tah-e-kamand rahe

mah-o-parvīñ tah-e-kamand rahe

kin fazāoñ meñ ham buland rahe

ġham-e-hastī se be-niyāz sahī

ahl-e-dil phir bhī dard-mañd rahe

chashm-e-uqda-kushā se bhī na khule

ham kuchh is tarah band band rahe

bar-sar-e-dār ham sahī lekin

harf-e-haq kī tarah buland rahe

husn kī ḳhud-numā.īyāñ tauba

muddatoñ ham bhī ḳhud-pasand rahe

mai-o-mastī nahīñ hai us pe harām

mai-kade meñ jo hosh-mand rahe

ham haiñ rahbar se do qadam aage

hausle shauq se do-chand rahe

dushmanoñ kā gilā nahīñ 'tābish'

dost bhī darpai-e-gazand rahe

mah-o-parwin tah-e-kamand rahe

kin fazaon mein hum buland rahe

gham-e-hasti se be-niyaz sahi

ahl-e-dil phir bhi dard-mand rahe

chashm-e-uqda-kusha se bhi na khule

hum kuchh is tarah band band rahe

bar-sar-e-dar hum sahi lekin

harf-e-haq ki tarah buland rahe

husn ki KHud-numaiyan tauba

muddaton hum bhi KHud-pasand rahe

mai-o-masti nahin hai us pe haram

mai-kade mein jo hosh-mand rahe

hum hain rahbar se do qadam aage

hausle shauq se do-chand rahe

dushmanon ka gila nahin 'tabish'

dost bhi darpai-e-gazand rahe