mahdud hai ye wusat-e-alam bhi nazar mein

mahdūd hai ye vus.at-e-ālam bhī nazar meñ

gum ho gayā huuñ aisā tirī rāhguzar meñ

maiñ kashmakash-e-dahr se be-ilm huuñ ab tak

tū ḳhud hī batā kaun hai har chiiz meñ shar meñ

duniyā mire me.aar pe utregī na tā-umr

ye to hai khilaunā mirī nam-dīda nazar meñ

anqā hai zamāne se musāvāt-o-uḳhuvvat

ausāf-e-bashar DhūñDne nikle ho bashar meñ

taḳh.īl mirī arsh kā rakhtī hai taqaddus

hai rif.at-e-aflāk mirī fikr ke par meñ

le jā.egā tū mujh ko kahāñ ai ġham-e-hastī

saaya bhī mirā saath nahīñ ab to safar meñ

hai naqsh-e-kaf-e-pā tirā manzil kī bashārat

ab qāfile Thahreñge mirī rāhguzar meñ

sheroñ meñ 'nishāt' apne vo lāoge kahāñ se

jo rang taġhazzul kā hai naġhmāt-e-‘jigar’ meñ

mahdud hai ye wusat-e-alam bhi nazar mein

gum ho gaya hun aisa teri rahguzar mein

main kashmakash-e-dahr se be-ilm hun ab tak

tu KHud hi bata kaun hai har chiz mein shar mein

duniya mere mear pe utregi na ta-umr

ye to hai khilauna meri nam-dida nazar mein

anqa hai zamane se musawat-o-uKHuwwat

ausaf-e-bashar DhunDne nikle ho bashar mein

taKHil meri arsh ka rakhti hai taqaddus

hai rifat-e-aflak meri fikr ke par mein

le jaega tu mujh ko kahan ai gham-e-hasti

saya bhi mera sath nahin ab to safar mein

hai naqsh-e-kaf-e-pa tera manzil ki bashaarat

ab qafile Thahrenge meri rahguzar mein

sheron mein 'nishat' apne wo laoge kahan se

jo rang taghazzul ka hai naghmat-e-‘jigar’ mein