mahfil mein aate jate hain insan nae nae

mahfil meñ aate jaate haiñ insāñ na.e na.e

ab to chalan liye haiñ mirī jaañ na.e na.e

us zulf o ruḳh ke ishq kā charchā huā ye kuchh

hairāñ na.e na.e haiñ pareshāñ na.e na.e

aa aa ke apnī apnī sunātā hai har koī

zaḳhm-e-jigar pe haiñ namak-afshāñ na.e na.e

mujh ko sunā ke kahte haiñ logoñ ko is se kyā

andāz ham ne sīkhe haiñ haañ haañ na.e na.e

aa jaa.eñ ham bhī yaad kisī baat par kabhī

āshiq hue haiñ ab to mirī jaañ na.e na.e

har dam na.ī na.ī hai ḳhalish merī jaan ko

laatī hai ranj-o-ġham shab-e-hijrāñ na.e na.e

bātoñ par un kī kyuuñ na yaqīn aa.e phir mujhe

qasmeñ na.ī na.ī haiñ to paimāñ na.e na.e

gar ab ke vasl ho to na mānūñ meñ ek bhī

dil ke nikālūñ hasrat-o-armāñ na.e na.e

sau sau tarah satātī hai ik ik kī yaad ab

shab aap ne kiye the jo ehsāñ na.e na.e

kis kis kī roz roz ḳhushāmad kiyā kareñ

hote haiñ un ke dar pe to darbāñ na.e na.e

ummīd bhī kabhī kabhī naumīdī hai mujhe

dikhlātī rañg hai shab-e-hijrāñ na.e na.e

koī to aaj aa.egā phir kis liye 'nizām'

tajvīzeñ haiñ na.ī na.ī sāmāñ na.e na.e

mahfil mein aate jate hain insan nae nae

ab to chalan liye hain meri jaan nae nae

us zulf o ruKH ke ishq ka charcha hua ye kuchh

hairan nae nae hain pareshan nae nae

aa aa ke apni apni sunata hai har koi

zaKHm-e-jigar pe hain namak-afshan nae nae

mujh ko suna ke kahte hain logon ko is se kya

andaz hum ne sikhe hain han han nae nae

aa jaen hum bhi yaad kisi baat par kabhi

aashiq hue hain ab to meri jaan nae nae

har dam nai nai hai KHalish meri jaan ko

lati hai ranj-o-gham shab-e-hijran nae nae

baaton par un ki kyun na yaqin aae phir mujhe

qasmen nai nai hain to paiman nae nae

gar ab ke wasl ho to na manun mein ek bhi

dil ke nikalun hasrat-o-arman nae nae

sau sau tarah satati hai ek ek ki yaad ab

shab aap ne kiye the jo ehsan nae nae

kis kis ki roz roz KHushamad kiya karen

hote hain un ke dar pe to darban nae nae

ummid bhi kabhi kabhi naumidi hai mujhe

dikhlati rang hai shab-e-hijran nae nae

koi to aaj aaega phir kis liye 'nizam'

tajwizen hain nai nai saman nae nae