mahfilon ke darmiyan tanhaiyon ke darmiyan

mahfiloñ ke darmiyāñ tanhā.iyoñ ke darmiyāñ

zindagī guzregī kab tak vāhimoñ ke darmiyāñ

kuchh adhūre rang haiñ kuchh nā-mukammal aks haiñ

ḳhvāb zinda haiñ shikasta ā.inoñ ke darmiyāñ

dostī aur raushnī ke dā.ere haiñ muḳhtalif

ham sabhī maujūd haiñ in dā.eroñ ke darmiyāñ

ham to samjhe the ki ham āsūda-e-manzil hue

ik paḌāv aa gayā hai hijratoñ ke darmiyāñ

zindagī kār-e-musalsal hai to kaT hī jā.egī

chand yādoñ ke sahāre vahshatoñ ke darmiyāñ

vo bahut ma.asūm hai lekin use mālūm hai

dūsrā koī nahīñ hai dhaḌkanoñ ke darmiyāñ

ranjishoñ ke silsile yūñhī sadā baḌhte nahīñ

tīsrā koī to hai do bhā.iyoñ ke darmiyāñ

mahfilon ke darmiyan tanhaiyon ke darmiyan

zindagi guzregi kab tak wahimon ke darmiyan

kuchh adhure rang hain kuchh na-mukammal aks hain

KHwab zinda hain shikasta aainon ke darmiyan

dosti aur raushni ke daere hain muKHtalif

hum sabhi maujud hain in daeron ke darmiyan

hum to samjhe the ki hum aasuda-e-manzil hue

ek paDaw aa gaya hai hijraton ke darmiyan

zindagi kar-e-musalsal hai to kaT hi jaegi

chand yaadon ke sahaare wahshaton ke darmiyan

wo bahut masum hai lekin use malum hai

dusra koi nahin hai dhaDkanon ke darmiyan

ranjishon ke silsile yunhi sada baDhte nahin

tisra koi to hai do bhaiyon ke darmiyan