ab tu ho kisi rang mein zahir to mujhe kya

ab tū ho kisī rañg meñ zāhir to mujhe kyā

Thahre tire ghar koī musāfir to mujhe kyā

vīrāna-e-jāñ kī jo fazā thī so rahegī

chahke kisī gulshan meñ vo taa.ir to mujhe kyā

vo sham.a mire ghar meñ to be-nūr hī Thahrī

bāzār meñ vo jins ho nādir to mujhe kyā

vo rañg-fishāñ aañkh vo tasvīr-numā haath

dikhlā.eñ na.e roz manāzir to mujhe kyā

maiñ ne use chāhā thā to chāhā na gayā maiñ

chāhe mujhe ab vo mirī ḳhātir to mujhe kyā

duniyā ne to jaanā ki numū us meñ hai merī

ab ho vo mirī zaat kā munkir to mujhe kyā

ik ḳhvāb thā aur bujh gayā āñkhoñ hī meñ apnī

ab koī pukāre mire shā.ir to mujhe kyā

ab tu ho kisi rang mein zahir to mujhe kya

Thahre tere ghar koi musafir to mujhe kya

virana-e-jaan ki jo faza thi so rahegi

chahke kisi gulshan mein wo tair to mujhe kya

wo shama mere ghar mein to be-nur hi Thahri

bazar mein wo jins ho nadir to mujhe kya

wo rang-fishan aankh wo taswir-numa hath

dikhlaen nae roz manazir to mujhe kya

main ne use chaha tha to chaha na gaya main

chahe mujhe ab wo meri KHatir to mujhe kya

duniya ne to jaana ki numu us mein hai meri

ab ho wo meri zat ka munkir to mujhe kya

ek KHwab tha aur bujh gaya aankhon hi mein apni

ab koi pukare mere shair to mujhe kya