kuchh din to baso meri aankhon mein

kuchh din to baso mirī āñkhoñ meñ

phir ḳhvāb agar ho jaao to kyā

koī rañg to do mire chehre ko

phir zaḳhm agar mahkāo to kyā

jab ham hī na mahke phir sāhab

tum bād-e-sabā kahlāo to kyā

ik aa.ina thā so TuuT gayā

ab ḳhud se agar sharmāo to kyā

tum aas bañdhāne vaale the

ab tum bhī hameñ Thukrāo to kyā

duniyā bhī vahī aur tum bhī vahī

phir tum se aas lagāo to kyā

maiñ tanhā thā maiñ tanhā huuñ

tum aao to kyā na aao to kyā

jab dekhne vaalā koī nahīñ

bujh jaao to kyā gahnāo to kyā

ab vahm hai ye duniyā is meñ

kuchh kho.o to kyā aur paao to kyā

hai yuuñ bhī ziyāñ aur yuuñ bhī ziyāñ

jī jaao to kyā mar jaao to kyā

kuchh din to baso meri aankhon mein

phir KHwab agar ho jao to kya

koi rang to do mere chehre ko

phir zaKHm agar mahkao to kya

jab hum hi na mahke phir sahab

tum baad-e-saba kahlao to kya

ek aaina tha so TuT gaya

ab KHud se agar sharmao to kya

tum aas bandhane wale the

ab tum bhi hamein Thukrao to kya

duniya bhi wahi aur tum bhi wahi

phir tum se aas lagao to kya

main tanha tha main tanha hun

tum aao to kya na aao to kya

jab dekhne wala koi nahin

bujh jao to kya gahnao to kya

ab wahm hai ye duniya is mein

kuchh khoo to kya aur pao to kya

hai yun bhi ziyan aur yun bhi ziyan

ji jao to kya mar jao to kya