mahrumiyon ka dil par itna hai kuchh asar sa

mahrūmiyoñ kā dil par itnā hai kuchh asar sā

chāhat ke naam se bhī lagne lagā hai Dar sā

ik aah meñ Dhalī hai rūdād-e-zindagānī

umr-e-tavīl kā hai afsāna muḳhtasar sā

ruḳhsat huā hai dil se har shauq rafta rafta

ye shahr-e-ārzū bhī bantā chalā khañDar sā

aatā hai dhyān un kā yuuñ dasht-e-zindagī meñ

zulmat meñ shab kī jaise ho jalva-e-sahar sā

āsūdgi-e-ġham ne kitnā surūr baḳhshā

apne vajūd se bhī rahtā huuñ be-ḳhabar sā

andāz-e-pursish-e-ġham thā dil-fareb kitnā

vo dushman-e-tamannā lagtā thā chārāgar sā

ashkoñ ne zabt-e-ġham kī rakkhī hai laaj har dam

sau baar ghir ke aayā bādal magar na barsā

rāh-e-hayāt meñ ham tanhā nahīñ 'mubārak'

un kā ḳhayāl har dam rahtā hai ham-safar sā

mahrumiyon ka dil par itna hai kuchh asar sa

chahat ke nam se bhi lagne laga hai Dar sa

ek aah mein Dhali hai rudad-e-zindagani

umr-e-tawil ka hai afsana muKHtasar sa

ruKHsat hua hai dil se har shauq rafta rafta

ye shahr-e-arzu bhi banta chala khanDar sa

aata hai dhyan un ka yun dasht-e-zindagi mein

zulmat mein shab ki jaise ho jalwa-e-sahar sa

aasudgi-e-gham ne kitna surur baKHsha

apne wajud se bhi rahta hun be-KHabar sa

andaz-e-pursish-e-gham tha dil-fareb kitna

wo dushman-e-tamanna lagta tha chaaragar sa

ashkon ne zabt-e-gham ki rakkhi hai laj har dam

sau bar ghir ke aaya baadal magar na barsa

rah-e-hayat mein hum tanha nahin 'mubarak'

un ka KHayal har dam rahta hai ham-safar sa