mahw aisa teri surat mein hai shaida tera

mahv aisā tirī sūrat meñ hai shaidā terā

dekhtā hai vo har ik shakl meñ jalva terā

hai jo kuchh ālam-e-fānī meñ vo sab terā hai

jab se ham bole yahī bole ki terā terā

tū kahīñ ho maiñ tujhe DhūñD nikālūñgā zarūr

tū hai matlūb mirā aur maiñ joyā terā

terī tasvīr meñ ai jaañ nazar aa.ī mirī shakl

merī sūrat meñ nazar aaya jalva terā

chāk-dāmānī-e-āshiq ne ġhazab kar Daalā

ai mire parda-nashīñ khul gayā parda terā

dil bhī raushan tire jalve se hai aur āñkheñ bhī

har jagah nuur na.ī shaan se chamkā terā

tū ho jis rang meñ pahchāntā huuñ maiñ tujh ko

kabhī dhokā nahīñ khātā hai shanāsā terā

aa.ina hai ye isī meñ nazar aa.egī vo shakl

dekh ai tālib-e-haq dil ho na mailā terā

naam ginvāne ko yuuñ to haiñ bahut ahl-e-nazar

mirī jaañ par tirā 'akbar' hī hai shaidā terā

mahw aisa teri surat mein hai shaida tera

dekhta hai wo har ek shakl mein jalwa tera

hai jo kuchh aalam-e-fani mein wo sab tera hai

jab se hum bole yahi bole ki tera tera

tu kahin ho main tujhe DhunD nikalunga zarur

tu hai matlub mera aur main joya tera

teri taswir mein ai jaan nazar aai meri shakl

meri surat mein nazar aaya jalwa tera

chaak-damani-e-ashiq ne ghazab kar Dala

ai mere parda-nashin khul gaya parda tera

dil bhi raushan tere jalwe se hai aur aankhen bhi

har jagah nur nai shan se chamka tera

tu ho jis rang mein pahchanta hun main tujh ko

kabhi dhoka nahin khata hai shanasa tera

aaina hai ye isi mein nazar aaegi wo shakl

dekh ai talib-e-haq dil ho na maila tera

nam ginwane ko yun to hain bahut ahl-e-nazar

meri jaan par tera 'akbar' hi hai shaida tera