mai-e-gul-gun ke jo shishe mein pari rahti hai

mai-e-gul-gūñ ke jo shīshe meñ parī rahtī hai

chash-mastoñ meñ ajab jalvagarī rahtī hai

hai phañdīt ek vo bāñkā ki laḌe jab tak aañkh

mardumak panja-e-mizhgāñ meñ bharī rahtī hai

baaġh meñ jab vo gul-e-tāza-bahār aatā hai

bū-e-gul phir to havā par hī dharī rahtī hai

naala bulbul hai chaman-zār hai dil dāġhoñ se

aah tā-sub.h nasīm-e-saharī rahtī hai

mohtasib duḳhtar-e-raz ham se jo tū aaj milā.e

bazm-e-mastoñ meñ tirī mo'tabarī rahtī hai

saltanat faqr kī jin ko hī nahīñ pesh-e-nigāh

kauḌī aur ashrafī yaksāñ-nazarī rahtī hai

lab-o-chashm apne haiñ ik ālam-e-ḳhushkī-o-tarī

ishq meñ saltanat-e-bahr-o-bahrī rahtī hai

ashk-bārī se ġham-o-dard kī khetī-bāḌī

lahlahī sī nazar aatī hai harī rahtī hai

rū tirā kuhl basar ho na use to be-vaj.h

chashm meñ aa.ine ke be-basarī rahtī hai

aabrū paatī thī ḳhushkī ba-kamāl istiġhnā

āb-e-dariyā ke na hone meñ tarī rahtī hai

tosha-ḳhāna hai tirā gumbad-e-gardūñ jis meñ

mehr-o-mah se tirī dastār zarī rahtī hai

hai jo aġhyār ke har dam kī tirī āmad-o-shud

jism meñ jaan hamārī safarī rahtī hai

dīn-o-dil bikte haiñ hote haiñ ġham-e-dard ḳharīd

tire kūche meñ lagī ik guzrī rahtī hai

be-nishāñ zaḳhm se us tīr-e-nigah ke dil meñ

dard rahtā hai na paikāñ na sarī rahtī hai

dil ko bhī Dūbtī kyūñkar na nazar aa.e 'muhib'

kashtī-e-chashm to paanī se bharī rahtī hai

mai-e-gul-gun ke jo shishe mein pari rahti hai

chash-maston mein ajab jalwagari rahti hai

hai phandit ek wo banka ki laDe jab tak aankh

mardumak panja-e-mizhgan mein bhari rahti hai

bagh mein jab wo gul-e-taza-bahaar aata hai

bu-e-gul phir to hawa par hi dhari rahti hai

nala bulbul hai chaman-zar hai dil daghon se

aah ta-subh nasim-e-sahari rahti hai

mohtasib duKHtar-e-raz hum se jo tu aaj milae

bazm-e-maston mein teri mo'tabari rahti hai

saltanat faqr ki jin ko hi nahin pesh-e-nigah

kauDi aur ashrafi yaksan-nazari rahti hai

lab-o-chashm apne hain ek aalam-e-KHushki-o-tari

ishq mein saltanat-e-bahr-o-bahri rahti hai

ashk-bari se gham-o-dard ki kheti-baDi

lahlahi si nazar aati hai hari rahti hai

ru tera kuhl basar ho na use to be-wajh

chashm mein aaine ke be-basari rahti hai

aabru pati thi KHushki ba-kamal istighna

aab-e-dariya ke na hone mein tari rahti hai

tosha-KHana hai tera gumbad-e-gardun jis mein

mehr-o-mah se teri dastar zari rahti hai

hai jo aghyar ke har dam ki teri aamad-o-shud

jism mein jaan hamari safari rahti hai

din-o-dil bikte hain hote hain gham-e-dard KHarid

tere kuche mein lagi ek guzri rahti hai

be-nishan zaKHm se us tir-e-nigah ke dil mein

dard rahta hai na paikan na sari rahti hai

dil ko bhi Dubti kyunkar na nazar aae 'muhib'

kashti-e-chashm to pani se bhari rahti hai