mai-kada-saman thi nazron mein faza kal raat ko

mai-kada-sāmāñ thī nazroñ meñ fazā kal raat ko

chhā rahī thī un kī zulfoñ kī ghaTā kal raat ko

har-nafas māñgī duā-e-ḳhair īmāñ ke liye

mere pahlū meñ thā ik kāfir-adā kal raat ko

vo bahār-afroz āñchal sad gulistāñ darkinār

vo bahisht-e-ārzū rañgīñ-qabā kal raat ko

ā.īna-bardār ḳhuld-e-shauq vo lauh-e-jabīñ

vo charāġh-e-tūr rū-e-pur-ziyā kal raat ko

vo lab-e-jibrīl kā partav hasīñ tarz-e-kalām

qum-be-iznī kā ham e.ajāz-o-adā kal raat ko

uljhe uljhe se vo fiqre khoī khoī guftugū

sādgī meñ vo sharārat kā mazā kal raat ko

hāsil-e-sad-mai-kada 'manzūr' thā mere liye

be-irāda merā un kā sāmnā kal raat ko

mai-kada-saman thi nazron mein faza kal raat ko

chha rahi thi un ki zulfon ki ghaTa kal raat ko

har-nafas mangi dua-e-KHair iman ke liye

mere pahlu mein tha ek kafir-ada kal raat ko

wo bahaar-afroz aanchal sad gulistan darkinar

wo bahisht-e-arzu rangin-qaba kal raat ko

aaina-bardar KHuld-e-shauq wo lauh-e-jabin

wo charagh-e-tur ru-e-pur-ziya kal raat ko

wo lab-e-jibril ka partaw hasin tarz-e-kalam

qum-be-izni ka hum eajaz-o-ada kal raat ko

uljhe uljhe se wo fiqre khoi khoi guftugu

sadgi mein wo shararat ka maza kal raat ko

hasil-e-sad-mai-kada 'manzur' tha mere liye

be-irada mera un ka samna kal raat ko