mai-kade mein aaj ek duniya ko izn-e-am tha

mai-kade meñ aaj ik duniyā ko izn-e-ām thā

daur-e-jām-e-be-ḳhudī begāna-e-ayyām thā

ruuh larzāñ aañkh mahv-e-dīd dil nākām thā

ishq kā āġhāz bhī shā.ista-e-anjām thā

rafta rafta ishq ko tasvīr-e-ġham kar hī diyā

husn bhī kitnā ḳharāb-e-gardish-e-ayyām thā

ġham-kade meñ dahr ke yuuñ to añdherā thā magar

ishq kā dāġh-e-siyah-baḳhtī charāġh-e-shām thā

terī duzdīda-nigāhī yuuñ to nā-mahsūs thī

haañ magar daftar kā daftar husn kā paiġhām thā

shaaq ahl-e-shauq par thiiñ us kī ismat-dāriyāñ

sach hai lekin husn dar-parda bahut bad-nām thā

mahv the gulzār-e-rañgā-rañg ke naqsh-o-nigār

vahshateñ thī dil ke sannāTe the dasht-e-shām thā

be-ḳhatā thā husn har jaur-o-jafā ke ba.ad bhī

ishq ke sar tā-abad ilzām hī ilzām thā

yuuñ garebāñ-chāk duniyā meñ nahīñ hotā koī

har khulā gulshan shahīd-e-gardish-e-ayyām thā

dekh husn-e-sharmagīñ dar-parda kyā laayā hai rañg

ishq rusvā-e-jahāñ badnām hī badnām thā

raunaq-e-bazm-e-jahāñ thā go dil-e-ġham-ghīñ 'firāq'

sard thā afsurda thā mahrūm thā nākām thā

mai-kade mein aaj ek duniya ko izn-e-am tha

daur-e-jam-e-be-KHudi begana-e-ayyam tha

ruh larzan aankh mahw-e-did dil nakaam tha

ishq ka aaghaz bhi shaista-e-anjam tha

rafta rafta ishq ko taswir-e-gham kar hi diya

husn bhi kitna KHarab-e-gardish-e-ayyam tha

gham-kade mein dahr ke yun to andhera tha magar

ishq ka dagh-e-siyah-baKHti charagh-e-sham tha

teri duzdida-nigahi yun to na-mahsus thi

han magar daftar ka daftar husn ka paigham tha

shaq ahl-e-shauq par thin us ki ismat-dariyan

sach hai lekin husn dar-parda bahut bad-nam tha

mahw the gulzar-e-ranga-rang ke naqsh-o-nigar

wahshaten thi dil ke sannaTe the dasht-e-sham tha

be-KHata tha husn har jaur-o-jafa ke baad bhi

ishq ke sar ta-abad ilzam hi ilzam tha

yun gareban-chaak duniya mein nahin hota koi

har khula gulshan shahid-e-gardish-e-ayyam tha

dekh husn-e-sharmagin dar-parda kya laya hai rang

ishq ruswa-e-jahan badnam hi badnam tha

raunaq-e-bazm-e-jahan tha go dil-e-gham-ghin 'firaq'

sard tha afsurda tha mahrum tha nakaam tha