mai-kasho jam uTha lo ki ghaTaen aain

mai-kasho jaam uThā lo ki ghaTā.eñ aa.iiñ

ishrabū kahtī huī sard havā.eñ aa.iiñ

ishq o ulfat kī sazā mil ga.ī āḳhir mujh ko

mere aage mirī ma.asūm ḳhatā.eñ aa.iiñ

ab tavajjoh to mire haal pe ho jaatī hai

shukr kartā huuñ ki is but ko jafā.eñ aa.iiñ

ḳhanda-zan dāġh-e-ma.āsī pe huī jaatī hai

lo mirī sharm-e-gunah ko bhī adā.eñ aa.iiñ

vahī marne kī tamannā vahī jiine kī havas

na jafā.eñ tumheñ aa.iiñ na vafā.eñ aa.iiñ

phir vo āmāda hue mujh pe barasne ke liye

phir mire sar pe musībat kī ghaTā.eñ aa.iiñ

is qadar jaur-e-hasīnāñ se rahā ḳhauf-zada

hūreñ aa.iiñ to maiñ samjhā ki balā.eñ aa.iiñ

koh-e-ġham thā mirā in.ām-e-mohabbat shāyad

chaar jānib se uThālo kī sadā.eñ aa.iiñ

Dūbne vaalī hai kyā kashtī-e-ummīd ai 'josh'

mauj taḌpī lab-e-sāhil pe duā.eñ aa.iiñ

mai-kasho jam uTha lo ki ghaTaen aain

ishrabu kahti hui sard hawaen aain

ishq o ulfat ki saza mil gai aaKHir mujh ko

mere aage meri masum KHataen aain

ab tawajjoh to mere haal pe ho jati hai

shukr karta hun ki is but ko jafaen aain

KHanda-zan dagh-e-maasi pe hui jati hai

lo meri sharm-e-gunah ko bhi adaen aain

wahi marne ki tamanna wahi jine ki hawas

na jafaen tumhein aain na wafaen aain

phir wo aamada hue mujh pe barasne ke liye

phir mere sar pe musibat ki ghaTaen aain

is qadar jaur-e-hasinan se raha KHauf-zada

huren aain to main samjha ki balaen aain

koh-e-gham tha mera inam-e-mohabbat shayad

chaar jaanib se uThaalo ki sadaen aain

Dubne wali hai kya kashti-e-ummid ai 'josh'

mauj taDpi lab-e-sahil pe duaen aain