mai-KHana-e-hasti mein aksar hum apna Thikana bhul gae

mai-ḳhāna-e-hastī meñ aksar ham apnā Thikāna bhuul ga.e

yā hosh meñ jaanā bhuul ga.e yā hosh meñ aanā bhuul ga.e

asbāb to ban hī jaate haiñ taqdīr kī zid ko kyā kahiye

ik jaam to pahuñchā thā ham tak ham jaam uThānā bhuul ga.e

aa.e the bikhere zulfoñ ko ik roz hamāre marqad par

do ashk to Tapke āñkhoñ se do phuul chaḌhānā bhuul ga.e

chāhā thā ki un kī āñkhoñ se kuchh rañg-e-bahārāñ le liije

taqrīb to achchhī thī lekin do aañkh milānā bhuul ga.e

ma.alūm nahīñ ā.īne meñ chupke se hañsā thā kaun 'adam'

ham jaam uThānā bhuul ga.e vo saaz bajānā bhuul ga.e

mai-KHana-e-hasti mein aksar hum apna Thikana bhul gae

ya hosh mein jaana bhul gae ya hosh mein aana bhul gae

asbab to ban hi jate hain taqdir ki zid ko kya kahiye

ek jam to pahuncha tha hum tak hum jam uThana bhul gae

aae the bikhere zulfon ko ek roz hamare marqad par

do ashk to Tapke aankhon se do phul chaDhana bhul gae

chaha tha ki un ki aankhon se kuchh rang-e-bahaaran le lije

taqrib to achchhi thi lekin do aankh milana bhul gae

malum nahin aaine mein chupke se hansa tha kaun 'adam'

hum jam uThana bhul gae wo saz bajaana bhul gae