main aashiqi mein tab sun afsana ho raha hun

maiñ āshiqī meñ tab suuñ afsāna ho rahā huuñ

terī nigah kā jab suuñ dīvāna ho rahā huuñ

ai āshnā karam suuñ yak baar aa daras de

tujh baaj sab jahāñ suuñ begāna ho rahā huuñ

bātāñ lagan kī mat pūchh ai sham-e-bazm-e-ḳhūbī

muddat se tujh jhalak kā parvāna ho rahā huuñ

shāyad vo ganj-e-ḳhūbī aave kisī taraf suuñ

is vāste sarāpā vīrāna ho rahā huuñ

saudā-e-zulf-e-ḳhūbāñ rakhtā huuñ dil meñ daa.im

zanjīr-e-āshiqī kā dīvāna ho rahā huuñ

barjā hai gar sunūñ na.iiñ nāseh tirī nasīhat

maiñ jām-e-ishq pī kar mastāna ho rahā huuñ

kis suuñ 'valī' apas kā ahvāl jā kahūñ maiñ

sar-tā-qadam maiñ ġham suuñ ġham-ḳhāna ho rahā huuñ

main aashiqi mein tab sun afsana ho raha hun

teri nigah ka jab sun diwana ho raha hun

ai aashna karam sun yak bar aa daras de

tujh baj sab jahan sun begana ho raha hun

baatan lagan ki mat puchh ai sham-e-bazm-e-KHubi

muddat se tujh jhalak ka parwana ho raha hun

shayad wo ganj-e-KHubi aawe kisi taraf sun

is waste sarapa virana ho raha hun

sauda-e-zulf-e-KHuban rakhta hun dil mein daim

zanjir-e-ashiqi ka diwana ho raha hun

barja hai gar sunun nain naseh teri nasihat

main jam-e-ishq pi kar mastana ho raha hun

kis sun 'wali' apas ka ahwal ja kahun main

sar-ta-qadam main gham sun gham-KHana ho raha hun