main ab ukta gaya hun furqaton se

maiñ ab uktā gayā huuñ furqatoñ se

nikālūñ kis tarah tujh ko ragoñ se

judā.ī taak meñ baiThī huī thī

mohabbat kar rahe the mashvaroñ se

tujhe maiñ ne mujhe tū ne gañvāyā

magar ab fā.eda in tazkaroñ se

duā.eñ ho ga.iiñ nā rad tumhārī

maiñ qaa.il hī nahīñ huuñ falsafoñ se

mire sab hausle maare ga.e haiñ

tumhārī kam-sinī ke faisloñ se

tumhārī yaad ḳhūnī hai mirī bhī

laḌeñ ham kis tarah in bheḌiyoñ se

vo vahshat hai ki hai vo sog barpā

maiñ hañstā tak nahīñ huuñ qahqahoñ se

tumhāre ġham ki jaañ ko aa ga.e haiñ

nahīñ shāyad magar haañ kuchh dinoñ se

hamāre beach ik dīvār hai ab

ise ūñchā kareñge nafratoñ se

main ab ukta gaya hun furqaton se

nikalun kis tarah tujh ko ragon se

judai tak mein baiThi hui thi

mohabbat kar rahe the mashwaron se

tujhe main ne mujhe tu ne ganwaya

magar ab faeda in tazkaron se

duaen ho gain na rad tumhaari

main qail hi nahin hun falsafon se

mere sab hausle mare gae hain

tumhaari kam-sini ke faislon se

tumhaari yaad KHuni hai meri bhi

laDen hum kis tarah in bheDiyon se

wo wahshat hai ki hai wo sog barpa

main hansta tak nahin hun qahqahon se

tumhaare gham ki jaan ko aa gae hain

nahin shayad magar han kuchh dinon se

hamare beach ek diwar hai ab

ise uncha karenge nafraton se