main abhi se kis tarah un ko bewafa kahun

maiñ abhī se kis tarah un ko bevafā kahūñ

manziloñ kī baat hai rāste meñ kyā kahūñ

husn-e-be-hijāb par koī parda Daal lo

tum use sanam kaho maiñ use ḳhudā kahūñ

ai harīs-e-mai-kada ḳhūn-e-zindagī na pī

tū sharāb agar piye tujh ko pārsā kahūñ

gesū-e-siyāh kī ye hasīñ darāziyāñ

raat kyuuñ kahūñ unheñ raat kī duā kahūñ

tarjumān-e-rāz huuñ ye bhī kaam hai mirā

us lab-e-ḳhamosh ne mujh se jo kahā kahūñ

ġhair merā hāl-e-ġham pūchhte rahe magar

dostoñ kī baat hai dushmanoñ se kyā kahūñ

imtihān-e-shauq hai aisī āshiqī 'nushūr'

dil kā koī haal ho un ko dilrubā kahūñ

main abhi se kis tarah un ko bewafa kahun

manzilon ki baat hai raste mein kya kahun

husn-e-be-hijab par koi parda Dal lo

tum use sanam kaho main use KHuda kahun

ai haris-e-mai-kada KHun-e-zindagi na pi

tu sharab agar piye tujh ko parsa kahun

gesu-e-siyah ki ye hasin daraaziyan

raat kyun kahun unhen raat ki dua kahun

tarjuman-e-raaz hun ye bhi kaam hai mera

us lab-e-KHamosh ne mujh se jo kaha kahun

ghair mera haal-e-gham puchhte rahe magar

doston ki baat hai dushmanon se kya kahun

imtihan-e-shauq hai aisi aashiqi 'nushur'

dil ka koi haal ho un ko dilruba kahun