main apne jism ki diwar mein chunun KHud ko

maiñ apne jism kī dīvār meñ chunūñ ḳhud ko

phir apne-āp se bāteñ karūñ sunūñ ḳhud ko

tamām shahr meñ bikhrā paḌā hai merā vajūd

koī batā.e bhalā kis tarah chunūñ ḳhud ko

nikal paḌā huuñ maiñ ham-zād DhūñDne apnā

lagā ke baiThā huā huuñ ajab junūñ ḳhud ko

mire vajūd ke sab tāne-bāne uljhe haiñ

kidhar kidhar se maiñ suljhā.ūñ aur banūñ ḳhud ko

vo chiiz kyā hai ki jis kī talāsh meñ 'at.har'

udheḌ udheḌ ke apnā badan dhunoñ ḳhud ko

main apne jism ki diwar mein chunun KHud ko

phir apne-ap se baaten karun sunun KHud ko

tamam shahr mein bikhra paDa hai mera wajud

koi batae bhala kis tarah chunun KHud ko

nikal paDa hun main ham-zad DhunDne apna

laga ke baiTha hua hun ajab junun KHud ko

mere wajud ke sab tane-bane uljhe hain

kidhar kidhar se main suljhaun aur banun KHud ko

wo chiz kya hai ki jis ki talash mein 'athar'

udheD udheD ke apna badan dhunon KHud ko