main apne ru-ba-ru hun aur kuchh hairat-zada hun main

maiñ apne rū-ba-rū huuñ aur kuchh hairat-zada huuñ maiñ

na jaane aks huuñ chehra huuñ yā phir aa.ina huuñ maiñ

mirī majbūriyāñ dekho ki yakjā.ī ke paikar meñ

kisī bikhre hue ehsās meñ simTā huā huuñ maiñ

mire andar ke mausam hī mujhe tāmīr karte haiñ

kabhī sairāb hotā huuñ kabhī sahrā-numā huuñ maiñ

jo hai vo kyuuñ hai āḳhir jo nahīñ hai kyuuñ nahīñ hai vo

isī gutthī ko suljhāne hī meñ uljhā huā huuñ maiñ

ye baat ab kaise samjhā.ūñ maiñ in māsūm jharnoñ ko

guzar kar kin marāhil se samundar se milā huuñ maiñ

tabhī to 'shād' maiñ huuñ mo'tabar apnī nigāhoñ meñ

manāzir ko baḌī sanjīdgī se sochtā huuñ maiñ

main apne ru-ba-ru hun aur kuchh hairat-zada hun main

na jaane aks hun chehra hun ya phir aaina hun main

meri majburiyan dekho ki yakjai ke paikar mein

kisi bikhre hue ehsas mein simTa hua hun main

mere andar ke mausam hi mujhe tamir karte hain

kabhi sairab hota hun kabhi sahra-numa hun main

jo hai wo kyun hai aaKHir jo nahin hai kyun nahin hai wo

isi gutthi ko suljhane hi mein uljha hua hun main

ye baat ab kaise samjhaun main in masum jharnon ko

guzar kar kin marahil se samundar se mila hun main

tabhi to 'shad' main hun mo'tabar apni nigahon mein

manazir ko baDi sanjidgi se sochta hun main