main apne sare karb-o-bala le ke jaunga

maiñ apne saare karb-o-balā le ke jā.ūñgā

maiñ jab bhī jā.ūñ apnī anā le ke jā.ūñgā

āñkhoñ kī aabrū kā bhī rakkhūñgā maiñ ḳhayāl

āñkhoñ meñ gar ḳhalā hai ḳhalā le ke jā.ūñgā

fir.aun-e-vaqt se jo karūñgā muqābla

maiñ bhī duā karūñgā asā le ke jā.ūñgā

saare sipāh-o-tīr-o-tafang-o-tabar liye

ik karbalā-e-shauq sivā le ke jā.ūñgā

dil hai ki ek dasht-e-viġhā kyā karūñgā maiñ

is dasht-e-be-fazā kī atā le ke jā.ūñgā

jab vo chalegā mamlikat-e-shar meñ sar-buland

maiñ qarya qarya ḳhūnīñ qabā le ke jā.ūñgā

be-taur-o-be-tarīq jiyā ab karūñgā ye

un ke huzūr hamd-o-sanā le ke jā.ūñgā

jab sārbān utreñge gulzār-e-hast meñ

maiñ is zamīñ se bād-e-sabā le ke jā.ūñgā

dīvār-e-qahqaha ke safīroñ ko ho ḳhabar

dīvār-e-qahqaha kī duā le ke jā.ūñgā

us va.ada-e-shafā.at-e-jāñ pe jiyo 'anīs'

un ne kahā hai terī shifā le ke jā.ūñgā

main apne sare karb-o-bala le ke jaunga

main jab bhi jaun apni ana le ke jaunga

aankhon ki aabru ka bhi rakkhunga main KHayal

aankhon mein gar KHala hai KHala le ke jaunga

firaun-e-waqt se jo karunga muqabla

main bhi dua karunga asa le ke jaunga

sare sipah-o-tir-o-tafang-o-tabar liye

ek karbala-e-shauq siwa le ke jaunga

dil hai ki ek dasht-e-wigha kya karunga main

is dasht-e-be-faza ki ata le ke jaunga

jab wo chalega mamlikat-e-shar mein sar-buland

main qarya qarya KHunin qaba le ke jaunga

be-taur-o-be-tariq jiya ab karunga ye

un ke huzur hamd-o-sana le ke jaunga

jab sarban utrenge gulzar-e-hast mein

main is zamin se baad-e-saba le ke jaunga

diwar-e-qahqaha ke safiron ko ho KHabar

diwar-e-qahqaha ki dua le ke jaunga

us wada-e-shafaat-e-jaan pe jiyo 'anis'

un ne kaha hai teri shifa le ke jaunga