main apni bulandi ko bhi kho kar nahin girta

maiñ apnī bulandī ko bhī kho kar nahīñ girtā

TuuTā huā taara huuñ zamīñ par nahīñ girtā

har shāḳh se jaḌ phuuT ke girtī hai zamīñ meñ

bargad huuñ maiñ āñdhī meñ ukhaḌ kar nahīñ girtā

vo peḌ samar-dār kahīñ ghar meñ nahīñ hai

āñgan meñ mire ab koī patthar nahīñ girtā

is mahfil-e-yārāñ se agar jaate ho jaao

ik iiñT khisakne se kabhī ghar nahīñ girtā

lagtā hai kisī tiir se majrūh huā hai

varna tirī chhat par vo kabūtar nahīñ girtā

vus.at hī kahāñ hai ki samā jaa.e kisī tarah

is vāste nadiyoñ meñ samundar nahīñ girtā

har roz bachātā huuñ maiñ ḳhud ko yahāñ 'rahmat'

kaise kahūñ sar par koī patthar nahīñ girtā

main apni bulandi ko bhi kho kar nahin girta

TuTa hua tara hun zamin par nahin girta

har shaKH se jaD phuT ke girti hai zamin mein

bargad hun main aandhi mein ukhaD kar nahin girta

wo peD samar-dar kahin ghar mein nahin hai

aangan mein mere ab koi patthar nahin girta

is mahfil-e-yaran se agar jate ho jao

ek inT khisakne se kabhi ghar nahin girta

lagta hai kisi tir se majruh hua hai

warna teri chhat par wo kabutar nahin girta

wusat hi kahan hai ki sama jae kisi tarah

is waste nadiyon mein samundar nahin girta

har roz bachata hun main KHud ko yahan 'rahmat'

kaise kahun sar par koi patthar nahin girta