main bhi kya karta ki isko bewafa hona hi tha

maiñ bhī kyā kartā ki is ko bevafā honā hī thā

zindagī ko ek din mujh se judā honā hī thā

har duā ko mere haq meñ bad-duā honā hī thā

ab kisī se kyā gila jo kuchh huā honā hī thā

apne be-ta.abīr ḳhvāboñ kī jalan kis se kahūñ

is gulābī shahr ko ātish-kada honā hī thā

phir bhī paanī kī mujhe qīmat adā karnī paḌī

mere lab par tishnagī kā zā.iqa honā hī thā

maut ke be-rahm hāthoñ ko bahāne kī talāsh

zindagī ke saath koī hādisa honā hī thā

maiñ bahut hassās huuñ is meñ kisī kā kyā qusūr

aa.ina ban kar mujhe sañg-āshnā honā hī thā

maiñ ne apne saare nāḳhun kaaT Daale the magar

zaḳhm ko 'ma.asūm' dobāra harā honā hī thā

main bhi kya karta ki is ko bewafa hona hi tha

zindagi ko ek din mujh se juda hona hi tha

har dua ko mere haq mein bad-dua hona hi tha

ab kisi se kya gila jo kuchh hua hona hi tha

apne be-tabir KHwabon ki jalan kis se kahun

is gulabi shahr ko aatish-kada hona hi tha

phir bhi pani ki mujhe qimat ada karni paDi

mere lab par tishnagi ka zaiqa hona hi tha

maut ke be-rahm hathon ko bahane ki talash

zindagi ke sath koi hadisa hona hi tha

main bahut hassas hun is mein kisi ka kya qusur

aaina ban kar mujhe sang-ashna hona hi tha

main ne apne sare naKHun kaT Dale the magar

zaKHm ko 'masum' dobara hara hona hi tha