main chup kam raha aur roya ziyaada

maiñ chup kam rahā aur royā ziyāda

yaqīnan zamīñ kam hai dariyā ziyāda

shab-e-vasl murġh-e-sahar yaad rakhnā

zabāñ kaaT lūñgā jo royā ziyāda

maiñ nāzuk-mizājī se vāqif huuñ qāsid

isī vaj.h ḳhat meñ na likkhā ziyāda

do bose liye us ne do gāliyāñ diiñ

na lenā ziyāda na denā ziyāda

vo sair-e-chaman ke liye aa rahā hai

akaḌnā na shamshād itnā ziyāda

vo utnā hī bantā hai hirs-e-mujassam

ḳhudā jis ko detā hai jitnā ziyāda

amal par mujhe e'timād apne kam hai

ḳhudā ke karam par bharosa ziyāda

jo āñkheñ tire ḳhāk-e-dar se haiñ raushan

milāyā hai shāyad mamīrā ziyāda

mujhe ulfat-e-zulf jab se hai 'parvīñ'

batāte haiñ vo josh-e-saudā ziyāda

main chup kam raha aur roya ziyaada

yaqinan zamin kam hai dariya ziyaada

shab-e-wasl murgh-e-sahar yaad rakhna

zaban kaT lunga jo roya ziyaada

main nazuk-mizaji se waqif hun qasid

isi wajh KHat mein na likkha ziyaada

do bose liye us ne do galiyan din

na lena ziyaada na dena ziyaada

wo sair-e-chaman ke liye aa raha hai

akaDna na shamshad itna ziyaada

wo utna hi banta hai hirs-e-mujassam

KHuda jis ko deta hai jitna ziyaada

amal par mujhe e'timad apne kam hai

KHuda ke karam par bharosa ziyaada

jo aankhen tere KHak-e-dar se hain raushan

milaya hai shayad mamira ziyaada

mujhe ulfat-e-zulf jab se hai 'parwin'

batate hain wo josh-e-sauda ziyaada