main dar pe tere dar-ba-dari se nikal aaya

maiñ dar pe tire dar-ba-darī se nikal aayā

chal kar ba-durustī ġhalatī se nikal aayā

ab mas.ala ye hai tire mahvar meñ kab utrūñ

maiñ apnī hadoñ se to kabhī se nikal aayā

kab mujh ko nikalnā thā ye hairat hai falak ko

maidān-e-zamīñ meñ maiñ abhī se nikal aayā

is tīra-shabī meñ kisī jugnū kī chamak hai

yā jugnū ḳhud is tīra-shabī se nikal aayā

ai arsh-e-mo.allā ke makīñ tujh ko ḳhabar hai

maiñ terī taraf be-ḳhabarī se nikal aayā

dhyān aayā mujhe raat kī tanhā-safarī kā

yak-dam koī saaya sā galī se nikal aayā

sau pech-e-rah-e-rāhbarī thā ki maiñ jis se

apne hunar-e-rāhravī se nikal aayā

vo lamha-e-avval ki tū jab aañkh meñ utrā

vo vaqt bhī kyā thā ki ghaḌī se nikal aayā

main dar pe tere dar-ba-dari se nikal aaya

chal kar ba-durusti ghalati se nikal aaya

ab masala ye hai tere mahwar mein kab utrun

main apni hadon se to kabhi se nikal aaya

kab mujh ko nikalna tha ye hairat hai falak ko

maidan-e-zamin mein main abhi se nikal aaya

is tira-shabi mein kisi jugnu ki chamak hai

ya jugnu KHud is tira-shabi se nikal aaya

ai arsh-e-moalla ke makin tujh ko KHabar hai

main teri taraf be-KHabari se nikal aaya

dhyan aaya mujhe raat ki tanha-safari ka

yak-dam koi saya sa gali se nikal aaya

sau pech-e-rah-e-rahbari tha ki main jis se

apne hunar-e-rahrawi se nikal aaya

wo lamha-e-awwal ki tu jab aankh mein utra

wo waqt bhi kya tha ki ghaDi se nikal aaya