main dariya-e-qanaat-ashna hun

maiñ dariyā-e-qanā.at-āshnā huuñ

maiñ mauj-e-nishān-e-boriyā huuñ

maiñ āshiq-e-chashm-e-surma-sā huuñ

gar ḳhaak bhī huuñ to tūtiyā huuñ

tiflī hī se vahshat-āshnā huuñ

maiñ us dāman-e-dasht meñ palā huuñ

dekhe jo mujhe jahāñ ko dekhe

maiñ ā.ina-e-jahāñ-numā huuñ

chal sakte nahīñ jo baaġh tak bhī

tā.ūs-sifat adū-e-pā huuñ

dīvāna jo huuñ to huuñ maiñ ḳhāmosh

zanjīr jo huuñ to be-sadā huuñ

tā-gor bhī sifat se na pahuñchūñ

bil-farz agar hazār pā huuñ

sohbat ho bar.ār kis tarah yaar

tū shaah hai aur maiñ gadā huuñ

har sher meñ zulf kī hai tārīf

is bahr meñ mauj-āshnā huuñ

suntā nahīñ ek but mirā haal

fariyādī tujh se ai ḳhudā huuñ

kahtī hai zabān-e-hāl se maut

maiñ dard-e-firāq kī davā huuñ

kahtī hai ye ruuh tan se har-dam

tū ḳhaak jo ho to maiñ davā huuñ

ye tausan-e-umr garm-raftār

kahtā hai maiñ ab charāġh-pā huuñ

ai 'arsh' ziyārat ab karūñgā

maiñ rah-rav-e-dasht-e-karbalā huuñ

main dariya-e-qanaat-ashna hun

main mauj-e-nishan-e-boriya hun

main aashiq-e-chashm-e-surma-sa hun

gar KHak bhi hun to tutiya hun

tifli hi se wahshat-ashna hun

main us daman-e-dasht mein pala hun

dekhe jo mujhe jahan ko dekhe

main aaina-e-jahan-numa hun

chal sakte nahin jo bagh tak bhi

taus-sifat adu-e-pa hun

diwana jo hun to hun main KHamosh

zanjir jo hun to be-sada hun

ta-gor bhi sifat se na pahunchun

bil-farz agar hazar pa hun

sohbat ho barar kis tarah yar

tu shah hai aur main gada hun

har sher mein zulf ki hai tarif

is bahr mein mauj-ashna hun

sunta nahin ek but mera haal

fariyaadi tujh se ai KHuda hun

kahti hai zaban-e-haal se maut

main dard-e-firaq ki dawa hun

kahti hai ye ruh tan se har-dam

tu KHak jo ho to main dawa hun

ye tausan-e-umr garm-raftar

kahta hai main ab charagh-pa hun

ai 'arsh' ziyarat ab karunga

main rah-raw-e-dasht-e-karbala hun