main dil pe jabr karunga tujhe bhula dunga

maiñ dil pe jabr karūñgā tujhe bhulā dūñgā

marūñgā ḳhud bhī tujhe bhī kaḌī sazā dūñgā

ye tīrgī mire ghar kā hī kyuuñ muqaddar ho

maiñ tere shahr ke saare diye bujhā dūñgā

havā kā haath baTā.ūñgā har tabāhī meñ

hare shajar se parinde maiñ ḳhud uḌā dūñgā

vafā karūñgā kisī sogvār chehre se

purānī qabr pe katba nayā sajā dūñgā

isī ḳhayāl meñ guzrī hai shām-e-dard aksar

ki dard had se baḌhegā to muskurā dūñgā

tū āsmān kī sūrat hai gar paḌegā kabhī

zamīñ huuñ maiñ bhī magar tujh ko aasrā dūñgā

baḌhā rahī haiñ mire dukh nishāniyāñ terī

maiñ tere ḳhat tirī tasvīr tak jalā dūñgā

bahut dinoñ se mirā dil udaas hai 'mohsin'

is aa.ine ko koī aks ab nayā dūñgā

main dil pe jabr karunga tujhe bhula dunga

marunga KHud bhi tujhe bhi kaDi saza dunga

ye tirgi mere ghar ka hi kyun muqaddar ho

main tere shahr ke sare diye bujha dunga

hawa ka hath baTaunga har tabahi mein

hare shajar se parinde main KHud uDa dunga

wafa karunga kisi sogwar chehre se

purani qabr pe katba naya saja dunga

isi KHayal mein guzri hai sham-e-dard aksar

ki dard had se baDhega to muskura dunga

tu aasman ki surat hai gar paDega kabhi

zamin hun main bhi magar tujh ko aasra dunga

baDha rahi hain mere dukh nishaniyan teri

main tere KHat teri taswir tak jala dunga

bahut dinon se mera dil udas hai 'mohsin'

is aaine ko koi aks ab naya dunga