main ek harf maani ka ek daftar wo

maiñ ek harf ma.ānī kā ek daftar vo

maiñ ek mauj-e-sarāb-e-junūñ samundar vo

tamām sābit-o-sayyār us ke halqa-ba-gosh

ye kā.enāt hai ik dā.era to mehvar vo

tamām mumlikateñ us ke hī qalam-rau maiñ

sab us ke zer-e-nagīñ bahr-o-bar kā dāvar vo

saroñ pe ahl-e-karam ke hai abr rahmat kā

sitam-garoñ ke liye qahr kā hai lashkar vo

kahīñ hai din kī tapish meñ shajar shajar saaya

kahīñ hai shab ke añdhere meñ māh-o-aḳhtar vo

koī madad ko na aa.egā aisī manzil hai

panāh jaañ ko milegī agar hai rahbar vo

phir us kī hamd-o-sanā kis tarah likhī jaa.e

hudūd-e-lafz-o-ma.ānī se jab hai bāhar vo

kitāb-e-dīn kī takmīl ho chukī 'mohsin'

zamīñ pe bhej chukā āḳhirī payambar vo

main ek harf maani ka ek daftar wo

main ek mauj-e-sarab-e-junun samundar wo

tamam sabit-o-sayyar us ke halqa-ba-gosh

ye kaenat hai ek daera to mehwar wo

tamam mumlikaten us ke hi qalam-rau main

sab us ke zer-e-nagin bahr-o-bar ka dawar wo

saron pe ahl-e-karam ke hai abr rahmat ka

sitam-garon ke liye qahr ka hai lashkar wo

kahin hai din ki tapish mein shajar shajar saya

kahin hai shab ke andhere mein mah-o-aKHtar wo

koi madad ko na aaega aisi manzil hai

panah jaan ko milegi agar hai rahbar wo

phir us ki hamd-o-sana kis tarah likhi jae

hudud-e-lafz-o-maani se jab hai bahar wo

kitab-e-din ki takmil ho chuki 'mohsin'

zamin pe bhej chuka aaKHiri payambar wo