main ek ret ka paikar tha aur bikhar bhi gaya

maiñ ek ret kā paikar thā aur bikhar bhī gayā

ajab thā ḳhvāb ki maiñ ḳhvāb hī meñ Dar bhī gayā

havā bhī tez na thī aur charāġh mar bhī gayā

maiñ sāmne bhī rahā zehn se utar bhī gayā

na ehtiyāt koī kaam aayā ishq ke saath

jo rog dil meñ chhupā thā vo kaam kar bhī gayā

ajab thī hijr kī saa.at ki jaañ pe ban aa.ī

kaḌā thā vaqt vo dil par magar guzar bhī gayā

havā se dostī jis ko thā mashvara merā

usī charāġh kī lau se maiñ aaj Dar bhī gayā

kabhī na mujh ko Darā.egā mere bātin se

ye ahd kar ke mirā ā.īna mukar bhī gayā

kināre vaale mujhe bas sadā.eñ dete rahe

bhañvar ko naav banā kar maiñ paar utar bhī gayā

maiñ ḳhāk-e-pā sahī kam-tar mujhe na jaan ki maiñ

ġhubār ban ke uThā āsmān par bhī gayā

maiñ apne jism ke andar thā āfiyat se magar

lahū ke sail-e-balā-ḳhez meñ ye ghar bhī gayā

ḳhatā ye thī ki maiñ āsāniyoñ kā tālib thā

sazā ye hai ki mirā tīsha-e-hunar bhī gayā

main ek ret ka paikar tha aur bikhar bhi gaya

ajab tha KHwab ki main KHwab hi mein Dar bhi gaya

hawa bhi tez na thi aur charagh mar bhi gaya

main samne bhi raha zehn se utar bhi gaya

na ehtiyat koi kaam aaya ishq ke sath

jo rog dil mein chhupa tha wo kaam kar bhi gaya

ajab thi hijr ki saat ki jaan pe ban aai

kaDa tha waqt wo dil par magar guzar bhi gaya

hawa se dosti jis ko tha mashwara mera

usi charagh ki lau se main aaj Dar bhi gaya

kabhi na mujh ko Daraega mere baatin se

ye ahd kar ke mera aaina mukar bhi gaya

kinare wale mujhe bas sadaen dete rahe

bhanwar ko naw bana kar main par utar bhi gaya

main KHak-e-pa sahi kam-tar mujhe na jaan ki main

ghubar ban ke uTha aasman par bhi gaya

main apne jism ke andar tha aafiyat se magar

lahu ke sail-e-bala-KHez mein ye ghar bhi gaya

KHata ye thi ki main aasaniyon ka talib tha

saza ye hai ki mera tisha-e-hunar bhi gaya