main ek TuTi hui zat le ke aaya hun

maiñ ek TuuTī huī zaat le ke aayā huuñ

badan pe taaza savālāt le ke aayā huuñ

jahāñ se miltī hai har shaḳhs ko matā-e-hayāt

maiñ us jagah se bhī ḳhairāt le ke aayā huuñ

Thahar sakūñ to Thahar jā.ūñ chal sakūñ to chalūñ

ajab shikasta se hālāt le ke aayā huuñ

bulandiyāñ bhī mirā jism pastiyāñ bhī badan

na jaane kaise maqāmāt le ke aayā huuñ

mujhe yaqīn nahīñ log aisā kahte haiñ

maiñ apne saath kamālāt le ke aayā huuñ

mire lahū se huī ḳhāk-e-zindagī sairāb

ġhurūr-e-azmat-e-sādāt le ke aayā huuñ

jahān-e-sher-o-ġhazal mere naam likh 'parvāz'

gudāz-e-ramz-o-kināyāt le ke aayā huuñ

main ek TuTi hui zat le ke aaya hun

badan pe taza sawalat le ke aaya hun

jahan se milti hai har shaKHs ko mata-e-hayat

main us jagah se bhi KHairaat le ke aaya hun

Thahar sakun to Thahar jaun chal sakun to chalun

ajab shikasta se haalat le ke aaya hun

bulandiyan bhi mera jism pastiyan bhi badan

na jaane kaise maqamat le ke aaya hun

mujhe yaqin nahin log aisa kahte hain

main apne sath kamalat le ke aaya hun

mere lahu se hui KHak-e-zindagi sairab

ghurur-e-azmat-e-sadat le ke aaya hun

jahan-e-sher-o-ghazal mere nam likh 'parwaz'

gudaz-e-ramz-o-kinayat le ke aaya hun