main gila tum se karun ai yar kis kis baat ka

maiñ gilā tum se karūñ ai yaar kis kis baat kā

ye kahānī din kī ho jaa.e na qissa raat kā

tark kī mujh se mulāqāt aap ne achchhā kiyā

ġham miTā har-vaqt kā jhagḌā gayā din-rāt kā

be-tamīzoñ se tabī.at āshnā hotī nahīñ

chāhne vaalā huuñ maiñ mahbūb-e-ḳhush aur raat kā

maiñ to kuchh kahtā huuñ tum se tum samajhte ho kuchh aur

jabki bātoñ meñ kalām aayā mazā kyā baat kā

tere aane kī duā māñgā kabhī jaagā kiye

rāt-bhar aalam rahā ai but ḳhudā.ī raat kā

vaah kyā nām-e-ḳhudā saj-dhaj hai kyā andāz hai

aadmī dekhā nahīñ is qad kā aur is kaat kā

sāmne yuuñ aa.e botal jaise aatī hai ghaTā

jaam yuuñ jhalke ki maiñ dekhūñ samāñ barsāt kā

ishq vo ġhārat-gar-e-īmāñ hai ye chāhe agar

vā.izoñ ko kalma paḌhvā.e manāt-o-lāt kā

aise jhūTe ho agar sach bhī kabhī ho bolte

e.atibār aatā nahīñ sāhab tumhārī baat kā

yaar tum ko dil nahīñ dene kā be-bosa liye

tum jo apnī gūñge ho maiñ bhī huuñ apnī ghaat kā

ahl-e-duniyā ḳhush hoñ yā nā-ḳhush hoñ kuchh parvā nahīñ

aasrā rakhtā hai ye banda ḳhudā kī zaat kā

jab tumhārī kaan kī bijlī chamak kar rah ga.ī

merī āñkhoñ ne samāñ dikhlā diyā barsāt kā

qāmat-e-jānāñ hai mīl-e-manzil-e-avval mujhe

kākul-e-shab-gūñ hai jaada vādī-e-āfāt kā

taash kā mūbāf choTī meñ muqarrar chāhiye

chāñdnī se aur hī hotā hai joban raat kā

'bahr' apnī apnī qismat hai ba-shakl-e-mehr-o-māh

zar use baḳhshā use kaasa diyā ḳhairāt kā

main gila tum se karun ai yar kis kis baat ka

ye kahani din ki ho jae na qissa raat ka

tark ki mujh se mulaqat aap ne achchha kiya

gham miTa har-waqt ka jhagDa gaya din-raat ka

be-tamizon se tabiat aashna hoti nahin

chahne wala hun main mahbub-e-KHush aur raat ka

main to kuchh kahta hun tum se tum samajhte ho kuchh aur

jabki baaton mein kalam aaya maza kya baat ka

tere aane ki dua manga kabhi jaga kiye

raat-bhar aalam raha ai but KHudai raat ka

wah kya nam-e-KHuda saj-dhaj hai kya andaz hai

aadmi dekha nahin is qad ka aur is kat ka

samne yun aae botal jaise aati hai ghaTa

jam yun jhalke ki main dekhun saman barsat ka

ishq wo ghaarat-gar-e-iman hai ye chahe agar

waizon ko kalma paDhwae manat-o-lat ka

aise jhuTe ho agar sach bhi kabhi ho bolte

eatibar aata nahin sahab tumhaari baat ka

yar tum ko dil nahin dene ka be-bosa liye

tum jo apni gunge ho main bhi hun apni ghat ka

ahl-e-duniya KHush hon ya na-KHush hon kuchh parwa nahin

aasra rakhta hai ye banda KHuda ki zat ka

jab tumhaari kan ki bijli chamak kar rah gai

meri aankhon ne saman dikhla diya barsat ka

qamat-e-jaanan hai mil-e-manzil-e-awwal mujhe

kakul-e-shab-gun hai jada wadi-e-afat ka

tash ka mubaf choTi mein muqarrar chahiye

chandni se aur hi hota hai joban raat ka

'bahr' apni apni qismat hai ba-shakl-e-mehr-o-mah

zar use baKHsha use kasa diya KHairaat ka