main ek musafir-e-tanha mera safar tanha

maiñ ik musāfir-e-tanhā mirā safar tanhā

dayār-e-ġhair meñ phirtā huuñ dar-ba-dar tanhā

mire ḳhilāf tamām āñdhiyāñ zamāne kī

maiñ ik charāġh sadāqat kī raah par tanhā

hai ek bhiiḌ magar koī bhī rafīq nahīñ

maiñ sochtā huuñ ki maiñ bhī huuñ kis qadar tanhā

na meTe miT sakīñ tanhā.iyāñ muqaddar kī

ki rah ke baaġh meñ bhī hai shajar shajar tanhā

tire bhī siine meñ apnoñ kā dard jāgegā

dayār-e-ġhair meñ koī to shaam kar tanhā

koī to baḌh ke ye kahtā ki rah-ravān-e-vatan

hai kārvān-e-mohabbat kā rāhbar tanhā

chaman meñ gūñje sadā bhī to kis tarah gūñje

parinda shāḳh pe bolā to hai magar tanhā

baḌe muhīb nazar aa.e hāl-o-mustaqbil

jab apne maazī ko sochā hai baiTh kar tanhā

nigāh puḳhta hai jis kī vahī ḳharīdegā

hai sañg-rezoñ ke bāzār meñ 'guhar' tanhā

main ek musafir-e-tanha mera safar tanha

dayar-e-ghair mein phirta hun dar-ba-dar tanha

mere KHilaf tamam aandhiyan zamane ki

main ek charagh sadaqat ki rah par tanha

hai ek bhiD magar koi bhi rafiq nahin

main sochta hun ki main bhi hun kis qadar tanha

na meTe miT sakin tanhaiyan muqaddar ki

ki rah ke bagh mein bhi hai shajar shajar tanha

tere bhi sine mein apnon ka dard jagega

dayar-e-ghair mein koi to sham kar tanha

koi to baDh ke ye kahta ki rah-rawan-e-watan

hai karwan-e-mohabbat ka rahbar tanha

chaman mein gunje sada bhi to kis tarah gunje

parinda shaKH pe bola to hai magar tanha

baDe muhib nazar aae haal-o-mustaqbil

jab apne mazi ko socha hai baiTh kar tanha

nigah puKHta hai jis ki wahi KHaridega

hai sang-rezon ke bazar mein 'guhar' tanha